Maaaring masuri ang joint bank account ng isang public official at ng kaniyang asawa kung kinakailangan, ayon kay Bantay Senado contributing legal expert Atty. Michael Tiu Jr.
Ayon kay Atty. Tiu, bagama’t may karapatan sa privacy ang asawa na isang pribadong mamamayan, obligasyon ng mga public official sa ilalim ng Republic Act No. 6713 o Code of Conduct and Ethical Standards for Public Officials and Employees na ideklara sa kanilang Statement of Assets, Liabilities, and Net Worth (SALN) ang mga ari-arian at pananagutan ng kanilang kabiyak.
Aniya, alam na ng isang opisyal ng gobyerno ang naturang obligasyon bago pa man ito manungkulan. Dahil dito, maaari umanong mabusisi ang pananalapi ng mag-asawa, lalo na kung may mga joint account na may kaugnayan sa isinasagawang imbestigasyon.
Mabibigo aniya ang layunin ng pagbusisi sa pinagmulan ng yaman ng isang public official kung magagamit ang joint account bilang panangga upang maitago o maipaliwanag ang mga pondong hindi maipaliwanag ang pinagmulan.
