Lanao del Sur niyanig ng magnitude 6 na lindol

Niyanig ng magnitude 6 na lindol ang bahagi ng Wao, Lanao del Sur, mag-aala-5:30 kaninang umaga.

Naitala ng PHIVOLCS o Philippine Insttitute of Volcanology and Seismology ang epicenter ng pagyanig, anim (6) na kilometro sa timog kanluran ng Wao.

Tectonic ang pinagmulan ng pagyanig na may lalim lamang na isang kilometro.

Naramdaman ang intensity 4 sa Davao City; Cagayan de Oro City; Cotabato City; at Gingoog City, Misamis Oriental.

Aftershocks

Hindi bababa sa labing apat (14) na pagyanig o aftershocks ang naramdaman ng mga residente ng Wao, Lanao del Sur kaninang umaga.

Kasunod ito ang pagyanig ng magnitude 6 na lindol sa Lanao del Sur pasado alas-5:00 kaninang madaling araw.

Ayon kay Shoraida Abantas, Department of Education Supervisor District 1 sa Wao, Lanao del Sur, ang ikalawa sa labing apat (14) na aftershocks ang pinakamalakas na kanilang naramdaman.

Samantala, pinawi ng PHIVOLCS ang pangamba ng mga residente sa Mindanao partikular ng mnga taga-Wao, Lanao del Sur at mga kalapit na lugar matapos yanigin ng magnitude 6 na lindol kaninang umaga.

Sinabi ni PHIVOLCS Director Renato Solidum na posibleng nagulat ang mga residente dahil bibihirang yanigin ng malakas na lindol ang Lanao del Sur bagamat mayroong maliliit na earthquake sa lalawigan.

Gayunman, pinayuhan ni Solidum ang mga residente at mga Pilipino na maging handa pa rin at palaging makinig sa advisory ng mga awtoridad.

Davao Oriental

Niyanig din ng magnitude 5 na lindol ang Governor Generoso sa Davao Oriental, mag-aalas-2:00 kaninang madaling araw.

Naitala ng PHIVOLCS ang sentro ng pagyanig, 230 kilometro sa timog silangan ng Governor Generoso.

Tectonic ang pinagmulan ng pagyanig na may lalim na labing walong (18) kilometro.

Naramdaman ang intensity 1 sa Sarangani, Davao Occidental.

Niyanig din ng magnitude 2.3 na lindol ang bahagi ng Itogon, Benguet, mag-aala-1:00 kaninang umaga.

Naitala ang sentro ng pagyanig labing anim (16) na kilometro sa timog silangan ng Itogon at ito ay may lalim na labing limang (15) kilometro.

Kahapon ng hapon ay tinamaan din ng magnitude 3.3 na lindol ang Baguilin, La Union, dahilan para masusupindi ang panghapong klase sa University of Baguio.

By Katrina Valle | Judith Larino

Comments

comments