Itinanggi ng Philippine Amusement and Gaming Corporation o PAGCOR na inabandona na ng Galaxy Entertainment Group ang planong pagtatayo ng integrated resort sa Boracay na may kasamang casino.
Ayon kay PAGCOR Chairperson Andrea Domingo, nasorpresa siya na mismong sa Department of Tourism o DOT nagmula ang impormasyon hinggil sa di umano’y pag-atras ng Galaxy Entertainment sa kanilang proyekto sa Boracay.
Sinabi ni Domingo na wala silang natatanggap na ganitong impormasyon mula sa Galaxy at maging sa Leisure and Resorts World Corporation na local partner ng itinuturing na gaming giant sa Macau.
Nakapagbigay na ng provisional approval sa proyekto ang PAGCOR matapos makakuha ng letter of no objection mula sa konseho ng Malay Aklan.
Gayunman, nilinaw ni Domingo na marami pang requirements ang dapat sundin ng Galaxy at Leisure and Resorts World bago makakuha ng lisensya sa itatayong casino.
Ang limandaang (500) milyong dolyar na integrated resort ay planong itayo sa lupaing pag-aari ng Leisure and Resorts World sa Boracay.
—-
