Isinauli rin ng casino junket operator na si Kim Wong sa Bangko Sentral ng Pilipinas (BSP) ang ikalawang batch ng pera na bahagi ng 81 million dollar na ninakaw ng mga hacker mula sa Central Bank of Bangladesh.
Inabot ng 2 oras ang Bangko Sentral sa pagbibilang sa P38.2 million pesos na idineliver sa pamamagitan ng isang suitcase sa headquarters ng BSP sa Maynila.
Ipinaliwanag ni Wong na ang nasabing halaga ay iniwan ng Chinese national Gao Suahua sa Eastern Hawaiian Leisure at Midas Hotel Casinos.
Magugunita noong isang linggo ay ibinalik ng casino junket operator sa BSP ang 4.63 million dollar na bahagi rin ng ninakaw na 81 million dollars mula sa Central Bank of Bangladesh.
FBI
Nagsasagawa na rin ng kanilang imbestigasyon ang Federal Bureau of Investigation o FBI hinggil sa P81 million pesos money laundering scandal.
Ito ang kinumpirma ng negosyanteng si Kim Wong bagama’t hindi na ito nagbigay pa ng iba pang detalye.
Una nang kinasuhan si Wong ng Anti-Money Laundering Council o AMLC makaraang sumabit ang kanyang pangalan sa na-hack na pera ng Bangladesh Central Bank sa Federal Reserve sa New York.
Pumasok sa bansa ang bahagi ng nasabing pera sa pamamagitan ng mga kliyente ni Wong na bigtime casino rollers.
By Jaymark Dagala | Drew Nacino | Cely Bueno (Patrol 19)