Magsisimula na ngayong araw, Marso a-25 ang kampanya para sa mga kandidatong tatakbo sa local elections.
Mahigpit ang naging paalala ng Commission on Elections (COMELEC) sa local candidates na panatilihin at sundin ang minimum public health protocols sa kabila ng mas maluwag na restriksiyon at gumagandang sitwasyon ng bansa.
Ayon kay Commissioner George Garcia, ipinagbabawal pa rin ang physical contact tulad ng pagyakap, paghalik at pakikipagkamay sa mga botante partikular na sa mga taga suporta ng mga kandidato.
Bukod pa dito, pinasisiguro din ng ahensya ang tamang pagsusuot ng facemask at pagsunod sa social distancing sa gitna ng campaign rally.
Matatandaang nagbabala ang mga health expert na posibleng muling maitala ang pagtaas ng mga kaso ng COVID-19 dahil narin sa pagtaas ng mobility at pagre-relax ng quarantine protocols ngayong election campaign period.
Aabot naman sa kabuuang 18,023 elective seat ang paglalabanan ngayon ng local candidates para sa Mayo a-9. – sa panulat ni Angelica Doctolero
