Inatasan ni Philippine National Police (PNP) Chief P/Gen. Guillermo Eleazar ang Firearms and Explosives Office gayundin ang iba pang unit ng Pulisya na paigtingin ang hakbang nito kontra loose firearms.
Ang pahayag ay ginawa bunsod na rin ng magkakahiwalay na operasyon ng Pulisya nitong nakalipas na mga araw kung saan, samu’t saring armas ang kanilang nasasabat na karamihan ay may matataas na kalibre.
Binigyang diin pa ni Eleazar, mahalagang mapigilan ang pagkalat ng loose firearms sa bansa lalo’t lumalapit na ang bansa sa panahon ng halalan kung saan, mataas ang insidente ng karahasan.
Magugunitang naaresto ng mga tauhan ng Northern Police District (NPD) si John Christian Bautista noong Hunyo a-15 dahil sa pagbebenta ng matataas na kalibre ng armas via online.
Kinabukasan naman, naaresto rin hanggang sa mapatay ang dati ring Pulis at dating Mayor ng Talitay, lalawigan ng Maguindanao na si Montasser Sabal na sinasabing supplier naman ng mga armas sa bandidong Bangsamoro Islamic Freedom Fighters (BIFF). —ulat mula kay Jaymark Dagala (Patrol 9)