Kinumpirma ng Islamic State of Iraq and Syria na sila ang nasa likod ng pag-atake sa isang nightclub sa Istanbul sa bansang Turkey nuong bisperas ng Bagong Taon.
Batay sa inilabas na pahayag ng Ismalic State sa Aamaq News Agency, ito’y bilang paghihiganti sa opensiba ng Turkish military laban sa ISIS sa mga bansang Syria at Iraq na kanila umanong teritoryo.
Kasunod nito, pinapurihan pa ng teroristang grupo ang suspek sa pamamaril kung saan, tinawag nila itong bayani laban sa mga Kristiyanong nagdiriwang ng pistang pagano.
Giit pa ng grupo, isang uri rin ng paghihiganti para sa relihiyon ng Diyos ang ginawang pamamaril ng suspek gamit ang automatic rifle gayundin ang paghahagis ng granada na ikinasawi ng tatlumpu’t siyam (39) at ikinasugat ng marami.
By Jaymark Dagala
