Isinailalim sa 14 na araw na lockdown ang isang buong residential building sa Barangay Tanza 1, Navotas City, simula ngayong araw.
Batay sa nilagdaang Executive Order ni Navotas City Mayor Toby Tiangco, sinimulan ang lockdown sa building 4 ng Navotas Socialized Housing kaninang alas 5:00 ng umaga at tatagal hanggang Setyembre 19.
Ayon kay Tiangco, napagpasiyahang isailalim sa lockdown ang gusali matapos umakyat sa 27 ang bilang ng residente doon na nagpositibo sa COVID-19 ngayon lamang Setyembre.
Kasabay ng lockdown, isasailalim naman sa swab test ang lahat ng residente ng building 4 ng Navotas Socialized Housing kung saan agad dadalhin sa community isolation facility ang mga magpopositibo sa COVID-19.
Habang pagkakalooban naman ng relief packs ang maiiwang pamilya ng mga nagpositibo.
Sa pinakahuling tala ng lokal na pamahalaan ng Navotas, umaabot na sa 4,473 ang kabuuang bilang ng nagpositibo sa COVID-19 sa Navotas kung saan 432 ang aktibo habang 126 ang nasawi.