Sugatan ang isang babaeng negosyante sa pananambang sa Pagadian City.
Nakilala ang biktima na si Elma Lumacad, limamput siyam (57) na taong gulang at may ari ng Lumacad Sand, Gravel and Hollow Blocks Construction sa naturang lungsod.
Ayon sa mga otoridad, nangyari ang pag atake kay Lumacad habang bumabagtas ito ng Sagun Bridge sa Barangay Balangasan kasama ang asawa sakay ng motorsiklo pasado ala 1:00 kaninang madaling araw.
Huminto muna ang mag asawa sa tulay nang mapansing may problema sa gulong ng likurang bahagi ng kanilang motorsiklo at biglang umatake ang mga suspek sakay din ng motorsiklo at ilang beses na pinagbabaril ang negosyante bago tumakas.
Si Lumacad ay nadaplisan lamang ng tama ng baril sa dibdib, ulo at kanang braso at kaagad isinugod sa Borbon Hospital sa Pagadian City.
Inaalam na ng mga otoridad ang motibo sa naturang pananambang.
