Kinumpirma ng Office of the Ombudsman na may natuklasang iregularidad sa Statements of Assets, Liabilities and Net Worth o SALN ng ilang miyembro ng Kamara na nasasangkot umano sa anomalya sa flood control projects.
Ayon kay Assistant Ombudsman Mico Clavano, lumabas ang mga iregularidad matapos ikumpara ang mga deklaradong ari-arian ng mga mambabatas sa records mula sa iba’t ibang registries bilang bahagi ng lifestyle checks.
Gayunman, hindi pinangalanan ni Clavano ang mga kongresistang may umano’y iregularidad dahil nagpapatuloy pa ang imbestigasyon.
Matatandaang nitong Abril ay nakakuha ang Ombudsman ng kopya ng SALN ng 26 na miyembro ng Kamara na nadawit sa flood control scandal.
Nilinaw din ni Clavano na hindi lamang flood control projects ang sakop ng pagsisiyasat kundi pati iba pang umano’y anomalya sa infrastructure projects. —sa panulat ni Jordan Gutierrez
