Mistulang bagong-laya ang karamihan ng taga-Metro Manila matapos dagsain ang mga mall at iba pang pasyalan sa ikatlong araw ng mas maluwag na alert level 2 sa national capital region.
Sa pag-iikot ng DWIZ, kabilang sa dinumog ang mga kilalang mall sa Mandaluyong, Pasay at Quezon City maging ang Luneta Park sa Maynila, Quezon City Memorial Circle at Marikina River Banks, kahapon.
Bagaman sarado pa rin ang Manila Bay dolomite beach, dinumog naman ng mga siklista at jogger, kasama ang kanilang mga anak, ang ibang bahagi ng baywalk gaya sa CCP Complex at MOA seaside sa Pasay City.
Samantala, muling pinaalalahanan ng Department of Health ang publiko lalo ang mga namamasyal na ugaliing sumunod sa minimum health protocols.—mula sa panulat ni Drew Nacino
