Bantay sarado na ng pulisya at mga tauhan ng barangay ang mga purok sa Brgy. Addition Hills sa Mandaluyong City.
Ayon sa pamahalaang lungsod, ito ang mga lugar na una nang natukoy na may mataas na naitatalang kaso ng COVID-19.
Partikular na isinailalim sa granular lockdown ang Zones 4, 5 at 9 na bahagi ng Block 41 ng naturang barangay.
Aabot sa humigit kumulang 100 kabahayan ang apektado ng nasabing lockdown at mahigpit na rin ang pagpapapasok sa mga grocery stores sa lugar.
Dahil dito, mahigpit na pinagbabawalan ang mga residente na lumabas ng bahay maliban na lang kung emergency, papasok sa trabaho o di kaya’y mamimili ng essential goods.
Hindi rin pinapayagang maglabas-masok ang mga hindi awtorisadong sasakyan at umiiral na rin ang liquior ban sa mga nabanggit na lugar.
Isang linggong tatagal ang granular lockdown sa Zones 4, 5 at 9 sa Brgy. Addition Hills o haggang sa Huwebes ng susunod na linggo, ika-18 ng Marso.
Batay sa pinakahuling datos, 65 ang naitalang bagong kaso ng COVID-19 sa Mandaluyong City.
Nasa 396 naman ang aktibong kaso sa lungsod kung saan 36 dito ay mula sa Addition Hills.
