Pananagutin din ng Energy Regulatory Commission (ERC) ang ibang mga power cooperatives at distributors sa isyu ng bill shock noong umiiral ang mahigpit na community quarantine.
Ayon kay ERC Chairperson Agnes Devanadera, bukod sa naunang paglabag ng Meralco sa kanilang mga ipinatutupad na panuntunan, may ilan pang mga power cooperatives at distributor na lumabag dito.
Pero ayon kay Devanadera, sa ngayon ay hindi pa aniya tiyak ang ahensya kung ilan ang mga kumpanyang lumabag sa kanilang panuntunan dahil hinihintay pa nila na magsumite ng paliwanag ang mga ito.
Magugunitang, pinatawan ng ERC ang Meralco ng P19 na milyong multa makaraang makaranas ng bill shock ang mga customers nito noong kasagsagan ng mas mahigpit na quarantine.
