Iginiit ni Manila Representative at House Prosecutor Joel Chua na hindi lamang pang-display ang mga public prosecutors na kabilang sa 11-man team na humahawak sa impeachment trial ni Vice President Sara Duterte.
Ayon kay Rep. Chua, may mahalagang papel ang bawat miyembro ng prosecution sa pag-usad ng kaso.
Anya, hindi man laging nakikita sa pagharap o pagtatanong sa impeachment court ang ilang public prosecutors, nangunguna anya ito sa pagtalakay ng mga ebidensya, pakikipanayam sa mga testigo, at pagpapasya kung sinu-sinong private prosecutors ang hahawak sa bawat artikulo ng impeachment.
Nilinaw din ng mambabatas na may mga miyembro rin ng prosecution team na nakatalaga sa pagsasaliksik, paghahanda ng mga dokumento, at iba pang mahahalagang gawaing kinakailangan, upang maging maayos ang paglilitis.
Sa kabila nito, nanawagan si Rep. Chua na huwag maliitin ang ambag ng bawat public prosecutor, dahil may kanya-kanyang responsibilidad ang mga ito.—sa panulat ni Reabelle Medina
