Magsasagawa ng deliberasyon ngayong araw ang Land Transportation Franchising and Regulatory Board o LTFRB.
Kasunod ito sa inihaing provisional fare reduction ng mga transport groups para sa mga bus, taxi at aircon jeepneys.
Ayon kay LTFRB Board Member Ariel Inton, buo na ang draft ng kanilang desisyon hinggil sa tapyas singil sa pasahe at kanila itong ilalabas anumang araw ngayong linggo.
Magugunitang inihirit ng mga transport group na gawing P11 na lamang ang pasahe sa aircon bus habang P9 naman sa ordinary bus.
Piso (P1) rin ang inihihirit na tapyas pasahe sa mga aircon jeepney habang nais ding ipako sa P30 ang flagdown rate sa mga taxi.
Kasunod nito, inihayag ni Inton na kanila pang pag-aaralan kung papayagan ang hirit ng mga taxi drivers na gawing P5 ang waiting time sa kada dalawang minuto mula sa kasalukuyang P3.50.
By Jaymark Dagala
