Inihayag ni cabinet secretary at acting presidential spokesperson Karlo Nograles na inaasahan ang mahigit 34,000 na trabaho ang malilikha pagkatapos maaprubahan ang mga proyekto noong fourth quarter ng 2021.
Ayon kay Nograles, inilabas ng Philippine Statistics Authority (PSA) na 133.47 billion pesos ang halaga ng kabuuang foreign investments ang naaprubahan sa fourth quarter ng nakaraang taon pa lamang.
Batay sa ulat ng PSA, ang investment commitments mula sa Singapore ay umabot sa bulto ng kabuuang halaga na 80.17 bilyon pesos, sinundan ng Netherlands na may 26.9 bilyon pesos, Japan na may 24.47 bilyon pesos, at iba pa.
Ang mga pangakong ito ay mula sa pitong ahensya sa pagsulong ng pamumuhunan, katulad ng: Board of Investments (BOI), Bangsamoro Autonomous Region in Muslim Mindanao (BARMM), Clark Development Corporation, at Philippine Economic Zone Authority (PEZA).
Kabilang din dito ang Subic Bay Metropolitan Authority, Cagayan Economic Zone Authority, at Authority of the Freeport Area of Bataan. —sa panulat ni Kim Gomez
