Mamamagitan na si Transportation Secretary Arthur Tugade sa hidwaan nina Metro Rail Transit Line 3 o MRT-3 General Manager Rudy Garcia at MRT-3 Director for Operations Michael Capati.
Ayon kay Transportation Communications Director Goddess Hope Libiran, pupulungin ni Tugade ang dalawa upang ma-plantsa ang gusot na namamagitan sa kanila.
Sinasabing may gusot sa pagitan ng dalawang MRT-3 official matapos umaning baliwalain ni Capati ang kanyang superior na si Garcia hinggil sa rehabilitation program ng mga tren at sa halip ay dumirekta kay DOTR Undersecretary Tj Batan.
Samantala, walang naitalang aberya sa biyahe ng MRT-3 sa nakalipas na sampung araw o simula noong Abril 2.
Inihayag ni MRT-3 Media Relations Officer Aly Narvaez, walang unloading incident ang naganap saanmang istasyon dahil labinlima hanggang labing-anim na ang tren at bagon ang operational.
Nabawasan o tuluyang nawala anya ang mahabang pila sa maraming istasyon dahil apat na minuto na lamang ang intervention ng dating ng bawat tren.
Gayunman, aminado si Narvaez na hindi ito nangangahulugan na ligtas na sa mga “minor glitch” ang kabuuang operasyon ng naturang railway system.
—-
