Kinatigan ni Dating Bayan Muna Representative Carlos Isagani Zarate ang kautusan ng Energy Regulatory Commission (ERC) sa Meralco na i-refund ang nasa 21.769 bilyong pisong halaga ng labis na singil sa kuryente sa mga konsyumer.
Ibinabala naman ng dating mambabatas ang posibilidad na mabalewala lamang ang mga gagawing bawas singil o refund dahil sa kamakailang desisyon ng Korte Suprema na nagpapahintulot na magtaas singil sa kuryente ang Meralco na aabot sa 22.64 billion pesos.
Kung hindi aniya malalabanan at mababago ang desisyon ng korte, lalamunin lang ang naturang refund ng pagtaas sa singil sa kuryente na sa bandang huli aniya’y may utang pa ang naghihirap na konsyumer.
Matatandaang, nauna nang inihayag ng Meralco na kahit tumaas pa ang ibang component ng bill gaya ng generation charge, kaya itong tapalan ng nasabing malaking refund. —sa ulat ni Tina Nolasco (Patrol 11)
