Naglabas ng health at security protocols ang Lungsod ng Tagbilaran, Bohol para sa paggunita ng “Kalag-Kalag” o undas sa susunod na linggo.
Sa inilabas na guidelines, papayagang bumisita sa sementeryo ang mga residente simula oktubre 30 hanggang Nobyembre 2 mula alas-6 ng umaga hanggang alas-10 ng gabi.
Babantayan ang mga mag o-overnight sa mga sementeryo. Mahigpit na ipinagbabawal ang alak, paninigarilyo, pagsusugal, at pagdadala ng matutulis na bagay. Gayundin, ang mga kagamitang lumilikha ng malalakas na tunog.
Patuloy namang hinihikayat ang pagsusuot ng face mask sa mga matataong lugar lalo na ang mga hindi bakunado, hindi fully vaccinated, mga senior citizens at immunocompromised na indibidwal.
Samantala, inaasahang magde-deploy ang Bohol Police Provincial Office (BPPO) ng mahigit 832 na kapulisan para matiyak ang kaligtasan sa pampubliko at pribadong sementeryo sa paggunita ng Undas 2022.
Sinabi naman ni outgoing BPPO Provincial PCOL. Osmundo Salido mahigit 1,757 ang itatalaga isang araw bago ang Undas para sa seguridad ng lugar.
Titiyakin din ng BPPO ang kaligtasan sa iba pang lugar na inaasahang pupuntahan ng mga tao sa long weekend. —sa panulat ni Maze Aliño – Dayundayon