Naglabas na ng mga alintuntunin ang lokal na pamahalaan ng Parañaque na dapat sundin sa mga pampublikong sementeryo sa Undas.
Ayon kay city administrator Voltaire Dela Cruz, pangungunahan ni Parañaque City Police Chief, Col. Renato Ocampo ang binuong task force na titiyak sa seguridad ng mga bibisita sa mga sementeryo.
Sa inilabas na memorandum na inilabas ni mayor Edwin Olivarez, sa October 29 hanggang 30 ay pinaalalahanan ang publiko na mula alas-6 ng umaga hanggang alas-5 ng hapon lamang ang pagdalaw sa mga puntod.
Bukas naman 24-oras ang mga pribado at pampublikong libingan sa lungsod simula October 31 hanggang November 1. —mula sa panulat ni Jenn Patrolla
