Tiniyak ng pamahalaan na ginagawa nito ang lahat para maayos na matugunan ang problema ng bansa sa 2019 corona virus disease (COVID-19).
Ito ang inihayag ni Presidential Spokesman Atty. Salvador Panelo bunsod ng pangamba ng publiko hinggil sa unti-unting pagkalat ng sakit na dulot ng naturang virus sa buong mundo.
Ayon kay Panelo, regular na nagpupulong ang inter-agency committee on emerging infectious disease para pag-aralan ang mga epekto ng COVID-19 sa bansa.
Nakalatag naman ang mga ikinasang plano para tiyaking nagagampanan ng tama ng pamahalaan ang paglaban sa virus upang hindi na ito makaapekto pa sa mga Pilipino.
Ibinida rin ni Panelo na napabilib din ng Pilipinas ang mismong World Health Organization (WHO) dahil sa maganda, maayos at sistematikong pagtugon nito sa paglaban sa COVID-19.
