Magpapautang ang gobyerno ng 400 Milyong Piso sa mga kooperatiba ng mga magsasaka upang maipambili ng makinarya.
Ayon kay Agriculture Secretary Manny Piñol, pangungunahan at inaprubahan ito ng mga executive board ng A.C.P.C o Agricultural Credit Policy Council na isa sa mga ahensya sa ilalim ng Kagawaran ng Agrikultura.
Binubuo ito ng Bangko Sentral ng Pilipinas, Department of Finance, Department of Budget and Management at ng mga magsasaka.
Paliwanag ni Piñol, ang nasabing pautang ay may interes na anim na porsyento kada taon at kailangang bayaran sa loob ng walong taon.
Layunin umano ng programang ito na matulungan ang mga magsasaka na makabili ng isang kalidad na makina kaysa mura ngunit mahinang klase.
Bukod dito tiwala din ang kalihim na mas mapapanatili ng maayos ang programa dahil tiyak na pahahalagahan at aalagaan ng mga magsasaka ang mga makinang sila mismo ang pumili.
Posted by: Robert Eugenio