Tiwala ang Department of Budget and Management o DBM na mapopondohan sa ilalim ng panukalang tatlong trilyong pisong pambansang budget sa susunod na taon ang libreng matrikula para sa mga mag-aaral ng state universities and colleges o SUCs sa buong bansa.
Ayon mismo kay Budget Secretary Benjamin Diokno, ito’y dahil sa committed si Pangulong Rodrigo Duterte na bigyan ng libreng edukasyon ang mga mahihirap na kabataang Pinoy.
Nagkakaisa ang pahayag ng ilang opisyal ng CHED o Commission on Higher Education at ng mga mambabatas na may-akda ng Free College Education Act na 20 bilyong piso lamang ang kakailanganin para mapondohan ang pagpapatupad nito.
Una nang ipinangako ng Pangulo na mararamdaman na ng mga mag-aaral sa kolehiyo ang pagpapatupad ng naturang batas sa unang semestre ng susunod na taon.
AR / DWIZ 882
