Kumalas na din sa Philippine Health Insurance Corporation (PhilHealth) ang Far Eastern University-Dr. Nicanor Reyes Medical Foundation (FEU-NRMF) Center makaraang umabot sa 200 milyong piso ang utang ng state insurer hanggang nitong katapusan ng Nobyembre.
Sinabi ni Chief Operating Officer Juan Enrique Reyes na umabot sa 114 million pesos ang utang ng PhilHealth noong Enero, at tumataas aniya ng walong milyong piso kada buwan ang receivables, kaya umabot ito sa 200 milyong piso.
Dahil dito, sinabi ni Reyes na hindi na sila magkakaltas ng PhilHealth benefits sa hospital bills ng mga miyembro nito ngunit tiniyak naman nito na magbibigay sila ng mga kinakailangang forms para sa pag a apply ng reimbursement.
Kailangan aniya nila itong gawin upang hindi sila mapilitang magsara.
Samantala, sinabi pa ni Reyes na patuloy silang makikipagtulungan ang FEU-NRMF sa PhilHealth para sa settlement.
