Isang estudyante ang nasa kritikal na kondisyon matapos tamaan ng bala sa ulo sa isa na namang insidente ng pamamaril sa isang paaralan sa Amerika.
Naganap ang nasabing pamamaril sa isang classroom sa Salvador Castro Middle School sa Westlake District, sa Los Angeles.
Batay sa ulat ng LA Police Department, labindalawang (12) taong gulang na babae ang suspek sa nasabing insidente na ngayon ay nasa kustodiya na ng awtoridad.
Ligtas naman sa kapahamakan ang isa pang mag-aaral na tinamaan naman ng bala sa kamay.
Nagtamo naman ng mga sugat at galos ang iba pang mag-aaral at mga empleyado matapos magkagulo dahil sa sunod-sunod na putok na pinakawalan ng suspek.
Patuloy naman ang imbestigasyon kaugnay sa naging motibo ng pamamaril ng menor de edad na suspek.
—-
