Hinimok ng isang kilalang election lawyer si Department of Interior and Local Government (DILG) Secretary Mar Roxas na i-withdraw ang election protest na isinampa laban kay Vice President Jejomar Binay.
Ito ay may kaugnayan sa resulta ng Vice Presidential elections noong 2010.
Ayon kay Atty. Romulo Macalintal, nauubusan na ng panahon si Roxas para ipursige ang kaso gayundin ang Korte Suprema na siyang tumatayong Presidential Electoral Tribunal o PET.
Ang PET ang namamahala sa mga protesta tungkol sa panalo ng Pangulo at Bise Presidente.
Idinagdag pa ni Macalintal na napaka-impractical kung gagastos pa ng halos P100 milyong piso si Roxas para ituloy ang nasabing election protest lalo’t sa pagkakataong ito ay patapos na ang term of office at nalalapit na rin ang halalan.
Matatandaang si Binay ang naging running mate ni dating Pangulo at ngayo’y Manila Mayor Joseph Estrada, habang si Roxas naman ang kandidatong Bise Presidente ni Pangulong Noynoy Aquino.
Nakatanggap si Binay ng kabuuang 14,645,574 boto, laban sa 13,918,490 boto ni Roxas na kalamangan ng 727,084 boto.
By Meann Tanbio