Pabibilisin ng Department of Public Works and Highways ang mga road projects nito sa Manila North Road o MacArthur Highway sa Bulacan, na nagdudulot ng matinding traffic sa mga motorista at residente.
Ayon sa Bulacan First District Engineering Office ng DPWH, nakipagpulong na sila sa mga project engineers at site inspectors ng ARL Construction at AESIC Construction para talakayin ang mga isyu sa trapiko.
Ipinag-utos na rin anila sa mga kontratista na gawing prayoridad ang paggawa sa gabi, at iwasan ang malalaking gawain tuwing rush hour.
Paiigtingin din ang paglalagay ng mga tamang traffic signs para mabawasan ang abala at matiyak ang kaligtasan ng publiko.
—sa panulat ni Daniela De Guzman
