Bigong maiuwi ng Filipina Actress na si Dolly de Leon ang Best Supporting Actress Award sa 80th Golden Globe Awards sa Los Angeles, United States.
Nasungkit naman ni Angela Bassett na bumida sa “Black Panther: Wakanda Forever” ang Best Supporting Actress in a Motion Picture.
Una rito, sinabi ni de Leon na itinuturing niyang achievement ang kanyang nominasyon at nagbukas aniya ito ng mas maraming oportunidad para sa mga Pilipino.
Ngunit higit aniyang mahalaga dito ang hangarin niyang maging mas mahusay na aktor at bilang isang tao.
Maliban sa nominasyon sa Golden Globes, nominado rin si Dolly sa Best Supporting Actress Category ng London Film Critics Circle, San Francisco Bay Area Film Critics Circle, at kasama rin siya sa listahan ng Best Supporting Actress sa 2023 British Academy of Film and Television Awards, at 57th National Society of Film Critics sa Amerika.
