KUMONSULTA na si Justice Secretary Jesus Crispin “Boying” Remulla sa isang international prison reform expert para sa pagbalangkas ng plano sa pagpapatupad ng reporma sa correction system sa bansa.
Ito’y makaraang matukoy umano na isa sa problematic agency ang Bureau of Corrections (BuCOR) at ang kontrobersiyang kinasasangkutan nito ay nakasisira sa imahe ng bansa.
Sinasabing ang pakikipagpulong ni Remulla kay Prof. Raymund Narag, dating inmate na nakulong ng 7 taon subalit ngayon ay associate professor na Southern Illinois University ay tila dagok naman sa pamumuno ni BuCor chief Gerald Bantag.
Ayon kay Atty. Nico Clavano ng Office of the secretary, nais ni Remulla na iayos ang correction system sa bansa sa naging pakikipagpulong nito kay Narag.
“It is uncertain in what capacity Prof. Narag will come in as but the two shared opinions and compared notes on the changes they seek to make,” nauna nang pahayag ni Clavano.
Si Bantag ay naitalaga bilang BuCor chief noong 2019 subalit ilang kontrobersya sa pamumuno sa ahensya ang kinasangkutan ng opisyal.
Ayon sa mga BuCor official na tumangging magpabanggit ng pangalan, sa loob ng tatlong taon ay wala pa ring pagbabago ang correctional facility sa ilalim ni Bantag.
Nabatid makailang beses din na naharap sa kontrobersiya si Bantag kung saan dineklara pa itong ‘persona non grata’ sa Muntinlupa City matapos niyang harangan ng mga pader ang ilang komunidad sa lungsod at isinara sa motorista ang isang kalsada bilang dagdag daw seguridad sa New Bilibid Prison(NBP) nang walang permiso mula sa lokal na pamahalaan at nagdulot ng malaking perwisyo sa mga residente.
Pumasok din sa isang maanomalyang Joint Venture Agreement(JVA) si Bantag sa pagitan ng Agua Tierra Oro Mina Development Corporation(ATOM) para sa paglipat ng prison facilities mula sa National Bilibid Prison(NBP) sa Muntinlupa sa Nueva Ecija na wala umanong konsultasyon at bidding process. Ang nasabing kasunduan ay agad na pinasuspinde ng DoJ.
Bukod dito, hindi rin kinunsulta noon ni Bantag si dating Secretary Menardo Guevarra nang payagan nitong ma-interview ng isang broadcast network sa loob ng NBP ang nakakulong na si Ret. Gen. Jovito Palparan.
Isinasangkot din daw si Bantag sa magkakasunud na misteryosong pagkamatay sa COVID 19 ng 8 high profile inmates sa pagitan ng May hanggang July 2020 na agad crinemate ang kanilang mga labi.
Una nang sinabi ni dating Justice Secretary Leila de Lima na kilalang berdugo si Bantag matapos umanong pasabugan ng granada ang 10 inmates nang ito ay hepe pa ng Paranaque Jail at kilala ding notoryus sa pagpapahirap sa mga inmates ng Manila City Jail at Bilibid.