Suportado ng Department of National Defense (DND) ang desisyon ni Pangulong Rodrigo Duterte na palawigin pa hanggang susunod na anim na buwan ang suspensyon bago tuluyang buwagin ang Visiting Forces Agreement o VFA sa pagitan ng Pilipinas at Amerika.
Ayon kay Defense Sec. Delfin Lorenzana, gagamitin nila ang susunod na anim na buwan para sa masusing pagrepaso ng VFA.
Ayon sa kalihim, naka-angkla ang bilateral cooperation ng Pilipinas at amerika sa paninindigan para sa pambansang interes hanggang sa pagpapatibay sa defense capability ng bansa.
Dahil dito, sinabi ni Lorenzana na gagawin nila kung ano ang dapat nilang gawin para maplantsa ang mga gusot na makatutulong sa pagpapasya ng Pangulo hinggil sa magiging kapalaran ng kasunduan sa hinaharap.
