Umapela na ang Department of Education (DepEd) sa Department of Information and Communications Technology (DICT) at National Telecommunications Company (NTC) na magbigay ng free internet access ngayong iiral ang blended learning dahil sa banta ng coronavirus disease 2019 (COVID-19).
Ayon kay Education Sec. Leonor Briones, malaking bagay kung magkakaroon ng libreng internet access para sa DepEd commons.
Ito aniya ay isang online platform na gagamitin bilang isa sa mga pamamaraan ng pag-aaral ng mga estudyante para sa school year 2020-2021.
Kaya naman umaasa si Briones na makatutulong ang dalawang ahensya para mapaghandaan ang pagbubukas ng klase sa ika-24 ng Agosto.
Dagdag pa ng kalihim, nais din sana niyang magkaroon ng maganda at malawak na internet connection lalo na sa mga malalayong lugar sa bansa na hanggang ngayon ay hindi pa naabot ng internet.