Pinangalanan ni Incoming President Rodrigo Duterte ang ilan pang personalidad na pupuno sa kaniyang gabinete.
Sa isinagawang Pulong Balitaan kagabi sa Davao City, sinabi ni Duterte na kaniyang itatalaga si dating National Treasurer Leonor Briones bilang Kalihim ng Department of Education o DepEd.
Magbabalik naman sa Department of Budget and Management o DBM si Professor Benjamin Diokno na minsan nang nanilbihan nuong Estrada Administration.
Gayunman, sinabi ni Duterte na sa Martes na malalaman kung sinu-sino naman ang uupo sa iba pang ahensya tulad ng Bureau of Customs (BOC), Philippine Drug Enforcement Agency o PDEA at Bureau of Internal Revenue (BIR).
Bagama’t wala pa ring napipiling Kalihim ng Department of Health, sinabi ni Duterte na posibleng isang career official ang kaniyang italaga sa nasabing puwesto.
Samantala, pinapurihan naman ni Duterte si Incumbent Tourism Secretary Ramon Jimenez ngunit nilinaw ni Duterte na hindi pa siya nakatitiyak kung mananatili ito sa puwesto o hindi.
By: Jaymark Dagala
