Humirit sa Commission on Elections (Comelec) ng exemption sa spending ban o “shopping ban” ang Department of Trade and Industry (DTI) hinggil sa pamamahagi ng livelihood kits sa buong bansa para sa mga biktima ng kalamidad.
Ayon kay Trade Secretary Ramon Lopez, patuloy pang namamahagi ang kanilang ahensya ng tulong sa mga biktima ng bagyong Odette sa Visayas maging sa mga apektado ng pag-aalburoto ng bulkang Taal sa Batangas.
Nabatid na aabot sa 300 hanggang 400 livelihood kits ang ipamimigay ng ahensya sa bawat probinsya kada buwan kung saan, nasa mahigit 57K na livelihood kits na ang naipamahagi at target pa itong paabutin sa mahigit 100K ngayong taon bago matapos ang termino ni Pangulong Rodrigo Duterte.
Samantala, naglaan din ang Department of Agriculture (DA) ng P7-M para naman sa mga magsasaka at mangingisdang apektado ng pagsabog ng bulkang Taal.
Ang spending ban o shopping ban ay ang pagbabawal sa pamimili o paggasta ng gobyerno sa gitna ng malakihang aktibidad sa bansa katulad ng halalan. —sa panulat ni Angelica Doctolero
