Martial Law sa buong bansa ibinabala ng Pangulo

Hindi mangingimi si Pangulong  Rodrigo Duterte  na ideklara sa  buong  bansa  ang idineklarang  Martial Law sa  Mindanao sa sandaling  umabot  hanggang  Luzon ang  paghahasik ng  karahasan ng  Maute  Group na  sympathizers  ng  grupong  ISIS  o Islamic  State  of  Iraq  and  Syria.

Ang  batas  militar  ay inianunsiyo  Martes  ng  gabi  habang  nasa  Russia  ang  Pangulo dahil sa  nagaganap na  kaguluhan sa  Marawi City  kung  saan  pinasok at  sinunog  ng  mga  terorista  ang  ilang ahensiya  ng  gobyerno  tulad  ng   hospital,  city jail at maging  unibersidad.

Sinabi ng  Presidente  na  hindi niya  papayagang  mamayani  ang  kaguluhan at  karahasan kayat  kinailangan niyang  magdeklara  ng  Martial Law para  matuldukan ang  paghahari-harian  ng  mga  local terror  group sa Mindanao.

Binigyang-diin  ni Pangulong  Duterte na  nakakalat  na  ang  ISIS  sa ibat  ibang  lugar  sa  bansa  at  hindi niya  hahayaang  maisakripisyo ang  mga  inosenteng  mamamayan .

Ayon sa  Punong  Ehekutibo, may mandato siya  na  protektahan at  tiyakin ang  kaligtasan ng  mga  Pilipino kayat aasahang  magiging  marahas  ito sa  mga  kalaban ng  gobyerno.

Umapela  ang  Pangulo sa sambayanan na  huwag hayaang  makapasok ang  ISIS sa bansa  dahil gagawin niya  ang  lahat  para  proteksiyonan ang  sambayanan.

Tinitiyak  ng  Chief  Executive  na   hindi niya  papayagang  umiiral ang  pang-aabuso  habang  umiiral ang  batas  militar  dahil  gumagana  pa ang  gobyerno , pati na ang  kongreso at  mga  korte.

Bukod sa  Mindanao  ay posibleng  palawakin ng  Pangulo hanggang  Visayas  region ang  Martial Law  at  kapag  kapag  umabot  ang  karahasan sa  Luzon ay  hindi malayong  isama  na  rin ang  Luzon sa  saklaw  ng  batas  militar.

By Meann Tanbio / with report from Aileen Taliping (Patrol 23) 

Comments

comments