Umaapela ang oposisyon para sa isang “conscience vote” sa halip na “pressure vote” sa death penalty bill upang mabigyan ang lahat ng miyembro ng Kamara ng pagkakataon na magdesisyon batay sa kanilang personal na pananaw.
Ayon kay Albay Representative Edcel Lagman, dapat payagan ang mga mambabatas na malayang gamitin ang kanilang sariling pananaw sa kontrobersya na panukala.
Inihayag naman ni Deputy Speaker Fredenil Castro, isa mga opisyal ng Nation Unity Party na kaalyado ng administrasyon na hindi pa nila natatalakay ang magiging paninindigan ng kanilang partido.
Gayunman, irerespeto anya nila ang anumang magiging pasya ng kanilang mga miyembro.
Inihayag din ni Castro, na isa sa mga co-author ng bill na layuning buhayin ang death penalty na mananawagan siya ng suporta sa mga NUP member para sa naturang panukala.
Magugunitang nakalusot ang bill sa House Justice Committee noong Disyembre habang nakatakda naman itong isponsoran sa plenaryo sa susunod na linggo.
By Drew Nacino
