Umakyat na sa 121 ang napaulat na nasawi dahil sa severe tropical storm Paeng.
Ayon sa National Disaster Risk Reduction and Management Council (NDRRMC), sa nasabing bilang ng mga napaulat na nasawi ay 92 ang kumpirmado habang ang iba ay bineberipika pa.
Karamihan sa fatalities ay mula sa Bangsamoro Autonomous Region in Muslim Mindanao (BARMM) kung saan 61 ang nasawi, sinundan ng Visayas na may 29 at Calabarzon na may 12.
Nakapagtala naman ang NDRRMC ng 103 katao na napaulat na nasugatan at 36 na nawawala.
Umabot sa kabuuang 3,180,132 indibidwal o 927,822 pamilya sa 7,341 barangays ang naapektuhan ng bagyo.
Sa naturang bilang, 176,337 katao o 49,698 pamilya ang nananatili sa 2,904 evacuation centers, habang 692,941 indibidwal o 277,825 pamilya naman ang nanunuluyan sa ibang mga lugar. – sa ulat ni Tina Nolasco (Patrol 11)
