Nadagdagan na naman ng isa ang death toll ng COVID-19 sa hanay ng Philippine National Police (PNP) na ngayo’y nasa 33 na.
Iyan ang inihayag ng Administrative Support to COVID-19 Operations Task Force (ASCOTF) batay sa datos naman mula sa PNP health service.
Ayon kay PNP Officer – In – Charge at ASCOTF Commander P/Ltg. Guillermo Eleazar, nasawi ang 54 na taong gulang na lalaking pulis mula sa NCRPO noong ika-12 ng Marso dulot ng acute respiratory failure, secondary to pneumonia high risk.
Kasunod nito, nakapagtala rin ang PNP ng 99 na bagong kaso ng virus sa kanilang hanay kaya’t sumampa na ito sa 12,162.
35 sa mga bagong kaso ay mula sa national operations support unit, 22 sa NCRPO, 16 sa Central Luzon at 10 naman mula sa national headquarters.
Lima ang naitala sa Central Visayas, tig – tatlo naman sa National Adminstrative Support Unit, CALABARZON at Northern Mindanao habang tig-isa ang naitala sa CARAGA at Cordillera Administrative Region.
Mula sa kabuuang bilang ng mga tinamaan ng virus, aabot sa 849 sa mga ito ang aktibo matapos madagdagan ng 14 ang mga gumaling sa sakit kaya’t umakyat na sa 11,280 ang total recoveries sa hanay ng PNP.