Inilabas na ng Department of Budget and Management (DBM) ang mahigit walong bilyong pisong alokasyon para sa ayuda na ibibigay sa mga magsasaka.
Ito’y matapos na aprubahan ng kagawaran ang notice of cash allocation para sa nasabing halaga na ipamamahagi ng Department of Agriculture (DA) sa mahigit isa punto limang milyong mga kwalipikadong magsasaka para sa ikatlo at ikaapat na yugto ng kasalukuyang taon.
Sinabi ni DBM Secretary Amenah Pangandaman, makatatanggap ng tig-limang libong piso ang bawat benepisyaryo na siyang nakasaad sa Rice Farmers’ Financial Assistance Program na makatutulong para maibsan ang epekto ng Rice Tariffication Law.
Magagamit aniya ang unconditional cash assistance na ito para sa kinakailangang farm inputs na tulad ng abono at langis.
Nakapaloob din sa pondo ang service fee, na kasama sa paggawa ng card para sa rice competitive enhancement fund sa ilalim ng Development Bank of the Philippines. - sa ulat ni Jopel Pelenio (Patrol 17)