Posibleng madagdagan pa ang mga kasong kahaharapin ni dating Pangulong Benigno Noynoy Aquino III kaugnay ng kontrobersyal na bakunang Dengvaxia.
Ito ang ibinabala ni House Committee on Good Government Chair at Surigao Del Sur Rep. Johnny Pimentel kasunod ng binubuong ulat ng komite matapos ang isinagawa nilang pagdinig hinggil sa usapin.
Binigyang diin ni Pimentel na posibleng sumabit si Aquino sa ginawang re-alignment ng pondo ng kaniyang administrasyon para ipambili ng tatlo’t kalahating bilyong Pisong halaga ng bakuna.
Nagmula aniya sa Maintenance and Other Operating Expenses ang naturang pondo na sadyang minadali umanong ilabas para isabay ang pagtuturok ng bakuna sa panahon ng kampaniya.
Matatandaang ganito rin ang ipinahiwatig ni Senate Blue Ribbon Committee Chairman Richard Gordon matapos lumabas sa kanilang padginig na minadali ng nakalipas na administrasyon bagay na itinanggi ng dating punong ehekutibo.