Sang-ayon si dating Ilo-Ilo Fifth District Representative Niel “Junjun” Tupas sa naging hakbang ng House Prosecution Panel sa pag-atras ng mga testigo para sa “Article Four o Grave Threats” sa impeachment trial ni Vice President Sara Duterte.
Ayon kay Rep. Tupas, tama ang naging desisyon ng prosekusyon, dahil ang Article 4 anya ang pinakamahinang bahagi ng Articles of Impeachment.
Dagdag pa ni Tupas, kung ipagpapatuloy pa ang presentasyon ng mga testigo, maaari lamang itong maging kapaki-pakinabang sa depensa at magbigay ng pagkakataong kwestiyunin ang kaso.
Bukod dito, sinabi niyang hindi na kailangang humarap si Director Melvin Matibag ng National Bureau of Investigation sa pagdinig sa July 20, dahil nailatag na ng dalawang testigo mula sa NBI ang naging imbestigasyon ng ahensya kaugnay sa grave threats ni VP Sara laban sa pamilyang Marcos.
Matatandaang nagsilbing lead prosecutor si Rep. Tupas noong 2012 sa impeachment trial laban kay dating Chief of Justice Renato Corona.—sa panulat ni Reabelle Medina
