Nananiniwala si House Assistant Majority Leader at Lanao del Sur 1st District Rep. Zia Alonto Adiong, na bilang isang lingkod bayan dapat maiparamdam ang suporta sa panawagan ng taumbayan na magkaroon ng transparency at accountability.
Reaksiyon ito ni Adiong matapos ang pagtanggi ni Davao City 1st District Rep. Paolo “Pulong” Duterte sa imbitasyon ng Independent Commission for Infrastructure o ICI na humarap sa pagdinig kaugnay sa iregularidad sa flood control projects sa kaniyang distrito.
Para kay Adiong, hindi dapat maging mapili at dapat mapanatili ng isang public servant ang paggalang sa kahit na anong imbestigasyon laban sa katiwalian.
Aniya, pagkakataon na ni Duterte na ilahad ang kaniyang panig; depensahan ang sarili; at patunayan na hindi siya sangkot sa pagnanakaw sa kaban ng bayan.
Iginiit ni Adiong na karamihan naman aniya sa mga miyembro ng House of Representatives ay handang makipagtulungan sa ginagawang pagsisiyasat ng ICI.
Ipinunto ni Adiong na kung wala kang itinatago at kinatatakutan, dapat maging bukas ang mga mambabatas sa mga imbestigasyon partikular sa ICI.
