Nasagip ng Philippine Coast Guard ang 20 pasahero ng lumubog na bangka sa karagatang sakop ng Catbalogan, Samar.
Ayon sa PCG Catbalogan, kabilang sa mga nailigtas ang isang taong gulang at apat na taong gulang na mga bata.
Galing ng Daram, Samar ang bangka at patungo sana sa Catbalogan nang hampasin ito ng naglalakihang alon na naging dahilan ng paglubog nito.
Mabilis na nakahingi ng tulong ang isa sa mga sakay ng bangka kaya’t mabilis ding nakaresponde ang mga tauhan ng coast guard.
Lumalabas sa imbestigasyon na overloaded ang bangka na may kapasidad lamang na magsakay ng sampung pasahero.
