Pansamantalang sinarado ang Central Office ng Commission on Higher Education (CHED) ngayon araw Hulyo 29 hanggang bukas, Hulyo 30.
Batay sa inilabas na kalatas ng CHED, ang naturang pagsasara ng kanilang tanggapan ay para bigyang daan ang isasagawang disinfection at sanitation sa kanilang pasilidad.
Bukod dito, sarado rin sa loob ng dalawang araw ang mga regional offices nito sa NCR, MIMAROPA at Region IV dahil sa kaparehong dahilan.
Kasunod nito, ayon sa pamunuan ng CHED, maaaring makipag-ugnayan ang publiko na may official business sa ahensya sa pamamagitan ng kanilang email address.
