SPORTS

Pinaplano ng pamunuan ng NBA at National Basketball Players Association na palawakin ang pagsasagawa ng COVID testing sa mga players at staff.

Ginawa ang naturang hakbang matapos umabot na sa 60 players ang inilagay sa quarantine.

Habang isinailalim na ang 13 players sa health and safety protocols, na siyang pinakamarami ngayong regular season.

Isasama rin sa puspusang COVID-19 test ang mga vaccinated players lalo na’t maraming selebrasyon ang magaganap ngayong kapaskuhan at bagong taon.

Magugunitang,  tinamaan ng COVID outbreaks ang mga teams ng Chicago Bulls, Charlotte Hornets at Brooklyn Nets.

Bukod sa Chicago Bulls, kinansela narin ng NBA ang training ng Los Angeles Lakers.

Ito ay matapos magpositibo sa COVID-19 si small forward-shooting guard Talen Horton-Tucker kung saan, naantala ang flight ng Lakers na patungo sanang Dallas para sa kanilang laban kontra Dallas Mavericks.

Dahil dito, inilagay na sa NBA health and safety protocols si Horton-Tucker para sa sampung araw na isolation.

Matatandaang nagpositibo din sa COVID-19 ang sampung Bulls players at pitong players ng Brooklyn Nets dahilan para ipagpaliban din ang kanilang laro.  —sa panulat ni Angelica Doctolero

Kumbinsido si pinoy pole vaulter EJ Obiena na sinasabotahe ni PATAFA President Philip Juico ang pagsabak niya sa Tokyo Olympics.

Sinabi ni Obiena sa pagharap niya sa House Committee on Youth and Sports Development ang pakiramdam niyang pagsabotahe sa tina-target niyang gold medal noong olympics.

Ito aniya ay dahil hindi man siya nakunsulta sa pagpili nang bubuo sa kanyang koponan na sasabak sa olympics at mali ang mga nabiling gamit ng PATAFA at nasira rin ang mga ito ilang linggo bago ang pagsabak niya sa olympics.

Una nang kinasuhan ni Juico si Obiena sa pamemeke ng reimbursement ng bayad sa coach nito noong 2017. —sa panulat ni Joana Luna

Nabigo ang filipina weightlifter na si Vanessa Sarno na maka-akyat sa podium sa women’s 71 kilogram division ng 2021 World Weightlifting Championships sa Tashkent, Uzbekistan.

Itinuturing na papalit sa pwesto ni Olympic Champion Hidilyn Diaz ang 18 anyos na pinay na nagtapos sa pang-limang pwesto mula sa 27 lumahok na weightlifters matapos mabuhat ang pinagsamang bigat na 231 kilograms.

Tabla si Sarno kay Patricia Strenius ng Sweden at Olivia Reeves ng USA.

Tinapos ni Sarno ang lahat ng kanyang tatlong buhat sa snatch at ang huli ay may bigat na 103 kilogram na nagdala sa kanya sa 5th place patungo sa Clean and Jerk.

Nasungkit naman ni Strenius ang third place habang si Reeves ay kumubra ng silver at tinanghal namang kampyon ang isa pang amerikanang si Meredith Alwine.

Dumagit ng tatlong gold, isang silver at dalawang bronze medals ang Philippine Muay team sa katatapos na 2021 International Federation of Muay Thai Associations World Championship (IFMA) sa Bangkok, Thailand.

 Namayagpag si Phillip Delarmino sa men’s 57 kilogram elite combat competition habang dinominahan ni islay bomogao ang Waikru Competition Senior Female category.

 Ang tagumpay ilonggong si Delarmino ang nagbigay-daan upang makakuha siya ng tiket sa 2022 world games sa July 7 hanggang 17 sa Birmingham, Alabama, USA.

 Katuwang naman ni Delarmino si Bomogao upang kubrahin ang gintong medalya sa Mai Muaythai category para sa team Philippines na nagtapos sa 18^th spot sa tournament rankings sa kanilang 8 points.

 Magugunitang si Bomogao ang sumipa ng pilak na medalya noong 2019 Southeast Asian games.

 Samantala, si Aldrich Toralba naman ang nagdagdag ng nag-iisang silver matapos pumangalawa sa waikru senior male category habang hinugot nina Bomogao at Rudzma Abubakar ang dalawang bronze sa women’s 45 kilogram at men’s 48 kilogram divisions.

Nagwagi ang Denver Nuggets kontra San Antonio Spurs sa NBA sa iskor na 127-112.

Tinambakan ng Nuggets ang Spurs sa ikalawa at ikatlong kwarter dahilan para maitala ng koponan ang ika-labin tatlong panalo sa NBA.

Nanguna sa koponan si Nikola Jokic na nakapagtala ng 35 points, 17 rebounds na may 8 assists habang pumuntos din ng 21 si Markus Howard na may isang rebound.

Abangan naman bukas ang susunod na laban ng Nuggets kung saan, kanilang makakaharap ang Washington Wizards alas-diyes ng umaga, oras sa Pilipinas. —sa panulat ni Angelica Doctolero

Wagi via Knockout si Nonito Donaire Jr. kontra sa kapwa Pinoy na challenger na si Reymart Gaballo at tinapos via Knockout ang kanilang WBC Bantamweight showdown sa Carson, California, USA

Hindi na pinatagal ni Donaire ang laban at pinatumba si Gaballo sa 2mins: 59 secs. sa 4^th round.

Gamit ang solidong left hook, tinamaan ng the Filipino Flash sa Bodega si Gaballo dahilan para bumagsak ito.

Sinubukan pa ng 25-anyos na challenger tumayo para muling lumaban pero hindi na nito kinaya dahil sa tindi at bilis ng bigwas ni Donaire.

Dahil dito, inaasahang makakaharap ni Nonito si Naoya Inoue na isa sa sagupaang inaabangan ng mundo.

PINADAPA ng Los Angeles Lakers ang Oklahoma City Thunder sa score na 116-95 sa kanilang laro sa NBA o National Basketball Association.

Kumamada si LeBron James ng 33 points habang nagdagdag naman si Avery Bradley ng 22 points para sa Lakers.

Samantala, rookie Tre Mann naman ang nanguna sa Oklahoma sa pamamagitan ng kanyang 19 points.

Umatras si Filipino boxer John Riel Casimero sa kanyang WBO bantamweight title defense laban kay Paul Butler ng United Kingdom sa Coca Cola Arena sa Dubai.

Ayon sa ulat, hindi nakasalang sa official weigh-in si Casimero matapos tamaan ng viral gastritis.

Napaulat naman na hinubaran na ng korona ang Pinoy boxing champion pero wala pang statement ang WBO ukol sa naturang usapin.

Inanunsyo ng International Olympic Committee (IOC) na ang skateboarding, sports climbing at surfing ay kasama sa inisyal na sports program para sa 2028 Olympics sa Los Angeles.

Ayon kay IOC President Thomas Bach, ang weightlifting, boxing at modern pentathlon ay hindi kabilang sa 28 sports, ngunit maaaring mapabilang ito kung maabot nila ang pamantayan sa IOC session sa 2023.

Unang pinakilala ang skateboarding, sports climbing at surfing nitong 2020 Tokyo Olympics kung saan naantala ang mga laro nito dahil sa COVID-19 pandemic. —sa panulat ni Kim Gomez