SPORTS

Handa na para sa dalawang training ang Philippine Azkals na gaganapin sa taong 2022.

Ayon kay Azkals Coach Stewart Hall, isasagawa sa buwan ng Enero at Marso ang mga friendly match bilang preparasyon para sa FIFA International Window ng 2023 AFC Asian Cup qualifiers na magsisimula sa Hunyo.

Aniya, dito rin pipili ang Azkals program director Scott Coppter ng mga manlalarong isasabak sa nasabing torneo.

Samantala, mayroong kabuuang 11 kuponan sa 24 na bansa ang aabante para sa AFC asian cup.—sa panulat ni Airiam Sancho

Dalawang silver medals ang sinungkit ng dalawang filipina karatekas sa 2021 Asian Karate Championships sa Almaty, Kazakhstan simula December 20 hanggang 22.

Napasakamay ni Junna Tsukii ang pilak matapos mahulog sa home bet na si Moldir Zhangbyrbay sa finals ng female-50 kilogram.

Silver din ang kinubra ni Jamie Lim sa 61 kilogram category matapos matalo kontra kay Sarah Alameri ng United Arab Emirates sa finals.

Sina Tsukii at Lim ay kapwa gold medalists sa 2019 Southeast Asian Games.

Naghahanda ang dalawa para sa May 2022 Hanoi Sea Games.

Nag-uwi naman ng bronze medal sa senior kata female ang isa pang pambato ng Pilipinas na si filipino-japanese Sakura Alforte.

Pinataob ng Milwaukee Bucks ang Houston Rockets sa NBA sa iskor na 126-106.

Tinambakan ng Bucks ang Rockets sa 1^st hanggang 3^rd quarter kung saan, nanguna sa kanilang panalo si Jrue Holiday na nagpakawala ng 24 points, 4 rebounds at 10 assists.

Nakapagtala din ng 23 points, 3 rebounds at 6 assists si Khris Middleton habang nasayang naman ang 20 points at 11 rebounds ni Christian Wood ng Rockets.

Abangan naman bukas ang susunod na laban ng Bucks kung saan, kanilang makakaharap ang Dallas Mavericks alas-9:30 ng umaga, oras sa Pilipinas.  —sa panulat ni Angelica Doctolero

Hindi mapapanood si NBA Star Dallas Mavericks All-Star Guard Luka Doncic sa christmas day games.

Ito’y matapos na sumailalim sa quarantine.

Maliban kay Luka, una nang inilagay sa health and safety protocols ang ilang teammates ng nasabing kuponan na sina Trey Burke, Tim Hardaway Junior, Maxi Kleber at Josh Green.

Batay sa patakaran ng NBA, kailangan ng isang player na nasa isolation na makapagbigay ng dalawang COVID-19 negative tests upang makabalik sa team. —sa panulat ni Airiam Sancho

Inanunsiyo ni Filipino-American Skier Asa Miller ang muling pagrepresenta sa bansa sa darating na 2022 Beijing Winter Olympics.

Sa Instagram post ni Miller, inihayag niya na muli siyang lalahok sa Winter Olympics.

Nagpakitang gilas ang 21-year-old skier sa 2018 Pyeongchang Winter Olympics kung saan kaniyang nakamit ang 70th place sa Giant Slalom Event.

Ang Beijing Winter Olympics ay isasagawa sa February 4 hanggang 20, 2022. —sa panulat ni Mara Valle

Pasok na sa finals ng 2021 Asian Karate Championship ang dalawang atleta na pambato ng bansa na kinilalang sina Junna Tsukii at Jamie Lim.

Makakaharap ni Tsukii ang pambato ng Kazakhstan para sa women’s 50-kilogram division na gaganapin sa Almaty, Kazakhstan kasunod ng kaniyang pagkapanalo laban sa mga Karate Athlete ng South Korea.

Matapos namang matalo ni Lim ang tatlong manlalaro sa kaniyang unang sinalihang event ay kaniya namang makakalaban sa finals si Sarah Alameri ng UAE sa 61-kg. Class.

Sa ngayon, naghahanda na ng pinaka magandang strategy ang dalawa para maiuwi ang gintong medalya sa bansa. —sa panulat ni Angelica Doctolero

Pinangangambahang mapilay ang Pilipinas kapag tuluyang hindi isinama ang boxing at weightlifting events sa 2028 Los Angeles Olympics.

Gayunman, determinado sina Boxing Chief Ed Picson at weightlifting head Monico Puentevella na i-aapela sa International Olympic Committee na huwag alisin ang mga nasabing sports sa nalalapit na olympics.

Binigyang diin nina Picson at Puentevella na dapat silang mabigyan ng pagkakataon na linisin at ayusin ang kanilang hanay.

Una nang nabunyag ang plano ng IOC na tanggalin ang boxing at weightlifting events dahil sa umano’y maanomalyang pamumuno ng organisasyon.

Muling sumikwat ng panalo ang Oklahoma City Thunders sa 2021-2022 NBA Regular Season.

Niresbakan ng Thunders ang 4th ranked sa Western Conference Division na Memphis Grizzlies sa score na 102-99.

Nagpakawala si Shai Gilgeous-Alexander ng 23 points upang pangunahan ang bumibisitang Oklahoma.

Magugunitang tinalo ng Grizzlies ang Thunders sa kanilang game noong December 3 sa score na 145-67 o 73 point margin, na pinaka-malaking kalamangan ng isang team sa kasaysayan ng nba.

Sa kabila ng panalo, nasa bottom 3 pa rin ng Western Conference ang Oklahoma sa kartadang 10-19.

Nagpaabot na ng tulong pinansyal ang Philippine Olympic Committee (POC) sa mga atletang naapektuhan ng bagyong Odette sa Visayas at Mindanao.

Ayon sa POC, 10 surfers at dalawang coach nila sa Siargao ang binigyan nila ng tig 10,000 pisong tulong pinansyal.

Kabilang sa mga nabigyan ng tulong si Olympic Marathoner Mary Joy Tabala na mula sa Cebu samantalang si John Matthew Carby lamang mula sa 10 surfer ang naka kontak sa POC na tiwalang matatawagan at kaagad matutulungan ang iba pang atletang naapektuhan ng bagyong Odette.

Umabante na ang Imus Banderas sa 2021 Maharlika Pilipinas Basketball League Invitational.

Sinikwat ng Imus ang number 1 spot sa Group D matapos pataubin ang Rizal Emkai Golden Coolers sa score na 90-79 sa kanilang paghaharap sa Mall of Asia Arena.

Pinangunahan ni Jyamo Eguilos ang Banderas sa score na 18 points, 8 rebounds at 2 assists habang nag-ambag ng double-doubles 17 points at 10 rebounds si Adi Santos.

Tinapos ng Imus ang elimination sa kartadang 4-1 kapantay ang Mindoro Tamaraws.

Makakalaban naman ng Imus sa Quarterfinals ang Bicol Volcanoes mamayang alas diyes ng gabi.