SPORTS

Nabigo ang filipina weightlifter na si Vanessa Sarno na maka-akyat sa podium sa women’s 71 kilogram division ng 2021 World Weightlifting Championships sa Tashkent, Uzbekistan.

Itinuturing na papalit sa pwesto ni Olympic Champion Hidilyn Diaz ang 18 anyos na pinay na nagtapos sa pang-limang pwesto mula sa 27 lumahok na weightlifters matapos mabuhat ang pinagsamang bigat na 231 kilograms.

Tabla si Sarno kay Patricia Strenius ng Sweden at Olivia Reeves ng USA.

Tinapos ni Sarno ang lahat ng kanyang tatlong buhat sa snatch at ang huli ay may bigat na 103 kilogram na nagdala sa kanya sa 5th place patungo sa Clean and Jerk.

Nasungkit naman ni Strenius ang third place habang si Reeves ay kumubra ng silver at tinanghal namang kampyon ang isa pang amerikanang si Meredith Alwine.

Dumagit ng tatlong gold, isang silver at dalawang bronze medals ang Philippine Muay team sa katatapos na 2021 International Federation of Muay Thai Associations World Championship (IFMA) sa Bangkok, Thailand.

 Namayagpag si Phillip Delarmino sa men’s 57 kilogram elite combat competition habang dinominahan ni islay bomogao ang Waikru Competition Senior Female category.

 Ang tagumpay ilonggong si Delarmino ang nagbigay-daan upang makakuha siya ng tiket sa 2022 world games sa July 7 hanggang 17 sa Birmingham, Alabama, USA.

 Katuwang naman ni Delarmino si Bomogao upang kubrahin ang gintong medalya sa Mai Muaythai category para sa team Philippines na nagtapos sa 18^th spot sa tournament rankings sa kanilang 8 points.

 Magugunitang si Bomogao ang sumipa ng pilak na medalya noong 2019 Southeast Asian games.

 Samantala, si Aldrich Toralba naman ang nagdagdag ng nag-iisang silver matapos pumangalawa sa waikru senior male category habang hinugot nina Bomogao at Rudzma Abubakar ang dalawang bronze sa women’s 45 kilogram at men’s 48 kilogram divisions.

Umatras si Filipino boxer John Riel Casimero sa kanyang WBO bantamweight title defense laban kay Paul Butler ng United Kingdom sa Coca Cola Arena sa Dubai.

Ayon sa ulat, hindi nakasalang sa official weigh-in si Casimero matapos tamaan ng viral gastritis.

Napaulat naman na hinubaran na ng korona ang Pinoy boxing champion pero wala pang statement ang WBO ukol sa naturang usapin.

Inanunsyo ng International Olympic Committee (IOC) na ang skateboarding, sports climbing at surfing ay kasama sa inisyal na sports program para sa 2028 Olympics sa Los Angeles.

Ayon kay IOC President Thomas Bach, ang weightlifting, boxing at modern pentathlon ay hindi kabilang sa 28 sports, ngunit maaaring mapabilang ito kung maabot nila ang pamantayan sa IOC session sa 2023.

Unang pinakilala ang skateboarding, sports climbing at surfing nitong 2020 Tokyo Olympics kung saan naantala ang mga laro nito dahil sa COVID-19 pandemic. —sa panulat ni Kim Gomez

Handa na si Nonito “The Filipino Flash” Donaire Jr. sa kaniyang pag-depensa sa WBC-118 world title laban sa kapwa Pinoy na si Reymart Gaballo na gaganapin sa Disyembre 11 sa Carson, California.

Ito ang unang sabak ng boksingero ngayong taon matapos na hindi matuloy ang laban sana nito kay Johnriel Casimiro.

Samantala, may rekord si Donaire na 41 wins, 6 loss, at 27 knockouts habang si Gaballo ay mayroong rekord na 24 wins, 20 knockouts at walang talo. —sa panulat ni Airiam Sancho

Philippine Para-Athletes, nasungkit ang siyam na medalya sa Asian Youth Para-Games sa Manama, Bahrain.

Nasungkit ng Philippine Para-Athletes ang siyam na medalya sa nilahukang Asian Youth Para-Games sa Manama, Bahrain.

Nilahukan ng 770 para-athletes mula sa 30 bansa ang naturang kompetisyon na ginanap nito lamang December 2 hanggang December 6, 2021 kung saan, bumida ang 20 Pinoy Para-Athlete mula Philippine Sports Association for the Differently Abled (PHILSPADA).

Naiuwi ni Para Swimmer Ariel Alegarbes ang gold medal sa S14 Butterfly Multiclass category, at silver medals naman sa SB14 100m breaststroke at 100m backstroke.

Nasungkit naman ni Para Table Tennis Player Linard Sultan ang dalawang silver mula sa Men’s singles class 8 at Men’s mixed team habang nagwagi rin ng silver medal sina Para Athletes Ronn Russel Mitra at Daniel Enderes, Jr.

Bronze medal naman ang nakuha ni Para Swimmer Angel Otom sa 100m freestyle S1-S10 at Para Table Tennis Player Mary Eloise Sable sa Women’s mixed team.

Ang Pilipinas ay may delegado rin para sa wheelchair basketball, badminton, at boccia. —sa panulat ni Angelica Doctolero

Tuloy pa rin ang pag-eensayo ni filipino boxer Jerwin Ancajas kahit na hindi natuloy ang laban nito kay Kazuka Loka ng Japan.

Aniya, medyo nalungkot siya sa naging desisyon ng gobyerno ng Japan na ipagpaliban ang laban nila ni Loka na dapat na gaganapin sa Disyembre 31 dahil sa pagsasara ng border nito bunsod ng banta ng Omicron variant.

Matatandaang, hindi lamang ito ang unang pagkakataon na ipinagpaliban ang laban. Dahil dalawang beses na ring naantala ang title defense nito bilang Internation Boxing Federation (IBF) Bantamweight Champion kay Jonathan Rodriguez. —sa panulat ni Airiam Sancho