SPORTS

Nagwagi sa Nba kahapon ang Los Angeles Lakers kontra Houston rockets sa iskor na 132-123.

Lumamang ng 9 ang koponan matapos matambakan sa 2^nd at 4^th quarter ang Rockets.

Nanguna sa panalo ng Lakers si small-forward shooting guard Lebron James matapos makapagtala ng 32 points, 11 rebounds at 11 assists habang nagpakawala din ng 25 points si Malik Monk at tig 24 points naman sina Russell Westbrook at Carmelo Anthony.

Abangan naman bukas ang susunod na laro ng Lakers kung saan, kanilang makakalaban ang Memphis Grizzlies, alas-9 ng umaga oras sa Pilipinas. —sa panulat ni Angelica Doctolero

Pinataob ng Brooklyn Nets ang Los Angeles Clippers sa NBA sa iskor na 124-108.

Tinambakan ng Nets ang Clippers sa una hanggang ikatlong quarter kung saan, nanguna sa koponan si point guard James Harden na nakapagtala ng 39 points, 8 rebounds at 15 assists habang nasayang naman ang 24 points, 5 rebounds at 6 assists ni Marcus Morris Sr. ng clippers.

Samantala, abangan naman ang susunod na laban ng Nets kung saan, kanilang makakaharap ang Philadelphia 76ers na gaganapin sa Biyernes, December 31, alas-8 ng umaga oras sa Pilipinas. —sa panulat ni Angelica Doctolero

Idineklara bilang Persona Non Grata ng Philippine Olympic Committee (POC) si Philippine Athletics Track and Field Association (PATAFA) President Philip Ella Juico matapos ang gusot sa pagitan nila ni Olympic Pole Vaulter Ej Obiena.

Ayon kay POC President Abraham “Bambol” Tolentino, hindi na nila kikilalaning pinuno ng PATAFA si Juico alinsunod sa isinagawang review ng Ethics Committee.

Hangga’t hindi anya nagsasagawa ng bagong eleksyon ang PATAFA ay mananatiling persona non grata si Juico pero kikilalanin pa rin ng POC ang nasabing National Sports Association, maging ang mga officer nito.

Sa ruling ng Ethics Committee, hinarass ni Juico si Obiena at gumawa ng mga malisyosong akusasyon na pineke ng SEA Games Gold Medalist ang liquidation reports nito kaugnay sa sweldo ni Ukrainian Coach Vitaly Petrov.

Samantala, si Obiena pa rin ang katatawan sa Pilipinas sa mga susunod na International Competitions sa 2022, kabilang ang Southeast Asian Games sa Hanoi, Vietnam at Asian Games sa Hangzhou, China.   —sa panulat ni Drew Nacino

Hindi na ipagpapatuloy ng Philippine Sports Commission ang alok na mamagitan sa kontrobersiya nina National Pole Vaulter Ernest John Obiena at ng PATAFA.

Bunsod ito ng naging desisyon ni Obiena na ipinost sa kanyang social media account.

Inihayag ng PSC na nirerespeto nila ang pagsumite ni Obiena ng mga dokumento sa ibang institusyon na mangangasiwa sa kanyang kaso.

Sa kabila nito, bukas ang ahensya sa proseso sakaling magkasundo na ang dalawang partido.   —sa panulat ni Drew Nacino

Inihayag ng Philippine Sports Commission (PSC) na pinaghahandaan na ng Pilipinas ang 31st Southeast Asian Games na gaganapin sa Hanoi, Vietnam.

Ayon kay PSC Commissioner Chef De Mission Ramon Fernandez, magkakaroon sila ng meeting sa pagpasok ng unang buwan ng taong 2022 upang pag-usapan ang natitirang dalawang buwan bago ang pagbubukas ng naturang event sa may 2022.

Siniguro ni Fernandez na handa ang bansa kung saan, plano ng Pilipinas na magpadala ng delegasyon na binubuo ng anim naraan at dalawamput anim (626) na atleta na isasabak sa dalawamput siyam (29) sa tatlumpung (30) sports sa Hanoi Sea Games Program.

Samantala, nakatakda ring isumite ng Philippine Olympic Committee (POC) ang entry ng bilang sa organizing committee ng 19th asian games na gaganapin naman sa Hangzhou, China.—sa panulat ni Angelica Doctolero

Inihayag ni UP Fighting Maroons player Ricci Rivero na magpapatuloy ang kaniyang karera sa pagiging atleta makaraang bumida sa isang pelikula.

Napapanood kasi ngayon sa upstream.ph ang pelikulang pinagbidahan ni Rivero kung saan, katambal nito si Sharlene San Pedro.

Ayon kay Rivero, mahal niya ang mundo ng basketball dahil ito ang isa sa nagpapasaya sakaniya kaya malabong iwan o talikuran niya ito.

Sinabi pa ng naturang atleta na sa kabila ng kaniyang busy schedule ay nagagawa niya paring makapagtraining. –Sa panulat ni Angelica Doctolero

Pinahiya ng Brooklyn Nets ang Los Angeles Lakers matapos magwagi sa kanilang laban sa sarili nilang bakuran sa score na 122-115.

Sa homecourt ng lakers, kumolekta Si James Harden ng 36 points, 10 assists at 10 rebounds kaya’t nangibabaw sa laro ang nets.

At sa isa pang christmas day showdown, sa pangunguna ni Giannis Antetokounmpo at iba pang manlalaro ay pinataob ng Milwaukee Bucks ang Boston Celtics sa score na 117-113.

Pinadapa ng Golden State Warriors ang Phoenix Suns sa kanilang sariling bakuran sa score na 116-107.

Kumamada si Stephen Curry ng 33 points kaya’t naipanalo ng Warriors ang kanilang laban.

Dahil dito, nangunguna na ngayon ang Golden State sa standings sa Western Conference taglay ang 27 wins at six losses.

Tila dobleng kamalasan ang inabot ni Pinoy boxing champion Vic Saludar sa kanyang laban sa Dominican Republic.

Bukod kasi sa naagawan siya ng WBA minimum weight title ng katunggali na si Erick Rosa Pacheco ay hindi pa nito nakuha ang premyong para sa kanya.

Ayon sa ulat, sa halip na 35,000 dollars ay nasa 13,000 dollars lamang ang natanggap na purse o premyo ni Saludar.

Dahil dito, agad na lumiham si Games and Amusement Board (GAB) Chairman Abraham Khalil Mitra sa WBA kung saan kinuwestiyon nito ang naturang isyu.

Patuloy pa rin ang pagpapagaling ni Brazilian Soccer Legend Pele kahit na nakalabas na ito ng ospital.

Ito’y dahil nagpapagamot ang soccer legend mula sa kaniyang sakit na cancer.

Matatandaang nuong December 8 ay dinala si pele sa ospital para sumailalim sa chemotherapy treatment dahil sa kaniyang colon tumor.

Tinanggal ang tumor sa kaniyang kanang colon nuong Setyembre na nadiskubre lamang makaraang magpacheck up ito sa kanyang doktor.

Si Pele ay naging three-time world cup winner na nakilala noong 1958 World Cup habang noong taong 2000 ay pinangalanan siya bilang Player of the Century ng FIFA kasama si Diego Maradona ng Argentina.