PINADAPA ng Toronto Raptors ang Golden State Warriors sa kanilang laban sa NBA sa score na 119-100.
Sina Fred VanVleet at Scottie Barnes ang nanguna sa Raptors makaraang kumamada ng pinagsamang 48 points.
Nabatid na walong manlalaro lamang ng Warriors ang humarap sa Toronto kaya’t nahirapan ito sa nasabing laban.
Kabilang sa mga hindi nakasalang sa laro sa panig ng Golden State si Jordan Poole dahil sa isyu sa health & safety protocols.
Pinataob ng Houston Rockets ang Detroit Pistons sa score na 116-107 sa kanilang laro sa NBA.
Sinasabing ito na ang ika-labing-apat na sunod na pagkatalo ng Pistons.
Kumamada si Christian Wood ng 21 points para sa Rockets habang nagdagdag naman si Eric Gordon ng 18 points.
Balik golf na si Tiger Woods, ilang buwan matapos itong maaksidente.
Si Woods ay muling sasabak sa golf sa PNC Championship sa Orlando, Florida, USA simula sa December 19 kasama ang anak na si Charlie.
Nalugmok si Danny Kingad ng Team Lakay sa kanyang ikatlong pagkatalo sa kamay ni dating flyweight champion Kairat Akhmetov ng Kazakhstan sa main event ng ONE: Winter Warriors II.
Ginamit ni Akhmetov ang kanyang grappling skills na nagpahirap sa Pinoy fighter.
Sa bandang huli, nasungkit ni Akhmetov ang unanimous decision win laban kay Kingad.
Samantala, sa supporting bout, bigo rin si dating bantamweight champion Kevin Belingon sa kamay ni Kwon Won II.
Posibleng ikasa na sa Marso ang rematch nina Nonito Donaire, Jr. at Undefeated Japanese Fighter Naoya Inoue.
Ito’y matapos patunayan ng “The Filipino Flash” na sa edad niyang 39 ay kaya pa ring makipagsabayan ng kanyang lakas at bilis bilang fighter.
Ayon kay Top Rank CEO Bob Arum, inaasahang magiging maatikabo ang ikalawang paghaharap nina Donaire at Inoue.
Magugunitang natalo si Donaire kay Inoue noong November 2019 via unanimous decision sa Saitama, Japan kahit pa nabasag ng the filipino flash ang kanang eye socket ng undefeated fighter sa kanilang laban.
Gayunman, aminado si Arum na magiging hadlang lang sa nilulutong bakbakan si World Boxing Organization Bantamweight Champion Johnriel Casimero.
Nakahanda ang Philippine Basketball Association (PBA) sakaling lumala ang kaso ng Omicron variant sa bansa.
Ito ay matapos payagan ang kanilang mga fans na personal na makapanood ng laban sa loob ng gym o court.
Ayon kay Pba Commissioner Willie Marcial, handa nilang sundin ang anomang kautusan ng gobyerno sakaling ipatupad ang semi-bubble dahil sa banta ng panibagong variant ng Covid-19.
Welcome naman sa pba sakaling turukan ng booster vaccine ang mga manlalaro. —sa panulat ni Angelica Doctolero
Pinaplano ng pamunuan ng NBA at National Basketball Players Association na palawakin ang pagsasagawa ng COVID testing sa mga players at staff.
Ginawa ang naturang hakbang matapos umabot na sa 60 players ang inilagay sa quarantine.
Habang isinailalim na ang 13 players sa health and safety protocols, na siyang pinakamarami ngayong regular season.
Isasama rin sa puspusang COVID-19 test ang mga vaccinated players lalo na’t maraming selebrasyon ang magaganap ngayong kapaskuhan at bagong taon.
Magugunitang, tinamaan ng COVID outbreaks ang mga teams ng Chicago Bulls, Charlotte Hornets at Brooklyn Nets.
Bukod sa Chicago Bulls, kinansela narin ng NBA ang training ng Los Angeles Lakers.
Ito ay matapos magpositibo sa COVID-19 si small forward-shooting guard Talen Horton-Tucker kung saan, naantala ang flight ng Lakers na patungo sanang Dallas para sa kanilang laban kontra Dallas Mavericks.
Dahil dito, inilagay na sa NBA health and safety protocols si Horton-Tucker para sa sampung araw na isolation.
Matatandaang nagpositibo din sa COVID-19 ang sampung Bulls players at pitong players ng Brooklyn Nets dahilan para ipagpaliban din ang kanilang laro. —sa panulat ni Angelica Doctolero
Kumbinsido si pinoy pole vaulter EJ Obiena na sinasabotahe ni PATAFA President Philip Juico ang pagsabak niya sa Tokyo Olympics.
Sinabi ni Obiena sa pagharap niya sa House Committee on Youth and Sports Development ang pakiramdam niyang pagsabotahe sa tina-target niyang gold medal noong olympics.
Ito aniya ay dahil hindi man siya nakunsulta sa pagpili nang bubuo sa kanyang koponan na sasabak sa olympics at mali ang mga nabiling gamit ng PATAFA at nasira rin ang mga ito ilang linggo bago ang pagsabak niya sa olympics.
Una nang kinasuhan ni Juico si Obiena sa pamemeke ng reimbursement ng bayad sa coach nito noong 2017. —sa panulat ni Joana Luna
Nabigo ang filipina weightlifter na si Vanessa Sarno na maka-akyat sa podium sa women’s 71 kilogram division ng 2021 World Weightlifting Championships sa Tashkent, Uzbekistan.
Itinuturing na papalit sa pwesto ni Olympic Champion Hidilyn Diaz ang 18 anyos na pinay na nagtapos sa pang-limang pwesto mula sa 27 lumahok na weightlifters matapos mabuhat ang pinagsamang bigat na 231 kilograms.
Tabla si Sarno kay Patricia Strenius ng Sweden at Olivia Reeves ng USA.
Tinapos ni Sarno ang lahat ng kanyang tatlong buhat sa snatch at ang huli ay may bigat na 103 kilogram na nagdala sa kanya sa 5th place patungo sa Clean and Jerk.
Nasungkit naman ni Strenius ang third place habang si Reeves ay kumubra ng silver at tinanghal namang kampyon ang isa pang amerikanang si Meredith Alwine.