SPORTS

HINUBARAN ng korona ni Filipino knockout artist Mark Magsayo si WBC featherweight champion Gary Russell Jr. sa Borgata Hotel Casino & Spa sa Atlantic City, New Jersey.

Umabot ng 12 rounds ang bakbakan pero nagwagi si Magsayo sa pamamagitan ng majority decision.

Nagka-injury sa balikat si Russell sa ika-apat na round kaya’t panay ilag na lang ang ginawa nito at halos hindi na nakapagbato ng suntok hanggang sa dulo ng kanilang laban.

Matapos manalo, sinabi ni Magsayo na handa siyang harapin muli si Russell sa isang rematch.

Hindi makakasabak sa laro sa loob ng anim hanggang walong linggo ang guard ng Chicago Bulls na si Alex Caruso.

Ayon sa management ng Bulls, ooperahan ang si Caruso dahil sa wrist injury nang mag-foul ito ni Grayson Allen ng Milwaukee Bucks kamakailan.

Napatawan ng level two flagrant foul si Allen at na-eject matapos ang nasabing laro.

Noong una ay simpleng foul lang ang ipinataw kay Allen pero itinaas ito sa flagrant matapos ma-review ng mga opisyal ang video kung saan napatunayan na sinadya nito ang pagsagi kay Caruso.

Irerepresenta ng Bren Victress at Omega Esports Empress ang Pilipinas sa Mobile Legends Bang Bang Women’s Invitational.

Magaganap ito sa Enero a-27 hanggang a-29.

Pitong koponan ang makakalaban ng dalawang grupo sa Southeast Asia para sa grandprice na 12 thousand US dollars o katumbas ng 798, 900 pesos.

Ilan sa kanilang makakalaban ay ang kinatawan ng Singapore, Malaysia, Cambodia, Laos at Indonesia. —sa panulat ni Abby Malanday

NANGIBABAW ang Brooklyn Nets laban sa San Antonio Spurs sa score na 117-102 sa kanilang laro sa NBA o National Basketball Association.

Kumamada si James Harden ng 37 points para sa Nets, kasama ang 11 assists at 10 rebounds.

Nakalamang ng limang puntos ang New Jersey sa third quarter at napanatili nito ang momentum sa fourth quarter kaya’t nanaig ito sa dulo ng laro.

Naniniwala si Filipino knockout artist Mark Magsayo na kaya niyang patulugin si WBC featherweight champion Gary Russell Jr. sa kanilang laban sa ring bukas sa Borgata Hotel Casino & Spa sa Atlantic City, New Jersey.

Ayon kay Magsayo, minamaliit umano siya ni Russell at tila ipinahiwatig nito sa kanya mabagal siyang gumalaw sa ibabaw ng parisukat na lona.

Si Magsayo ay naging mandatory challenger sa koronang hawak ni Russel matapos masungkit ang 10th round knockout laban kay Julio Ceja noong August 2021.

Wala pang talo si Magsayo sa dalawampu’t tatlong laban, kasama ang labing-anim na knockouts.

Wagi ang Pilipinas kontra Thailand sa 2022 AFC Women’s Asian Cup.

Naganap ito kahapon sa Dy Patil Stadium sa Navi Mumbai sa India.

Pinangunahan ni Chandler Mcdaniel ang pagpuntos ng lone goal sa unang walumpung isang minuto para kunin ang kalamangan na 1-0.

Ito ang unang pagkakataon na natalo ng Pilipinas ang Thailand sa 13 laro.

Dahil sa panalo, sigurado na ang tatlong puntos para sa Pilipinas na nasa ilalim ng Group B. —sa panulat ni Abby Malanday

Wagi sa NBA ang Brooklyn Nets matapos lumamang ng isang puntos kontra Washington Wizards sa iskor na 119-118.

Tinambakan ng Nets ang Wizards sa una at ikalawang quarter na pinangunahan ni Kyrie Irving na nagpakawala ng 30 points, 3 rebounds at 7 assists at Lamarcus Aldridge na nakaambag ng 27 points, 6 rebounds at 3 assists.

Abangan naman sa Sabado, January 22, ang susunod na laro ng Nets kung saan, kanilang makakalaban ang San Antonio Spurs alas-9:30 ng umaga, oras sa Pilipinas. —sa panulat ni Angelica Doctolero

Asahan na ang paglawak ng Korean Wave sa Pilipinas sa ikinakasang kasunduan ng Philippine Basketball Association (PBA) at Korean Basketball League (KBL).

Ayon kay PBA Commissioner Willie Marcial, nakipag-ugnayan na sa kanila ang KBL para palakasin ang pagkakaibigan ng dalawang liga.

Nais anya ni KBL President Kim Hee-Ok na pag-usapan ang isang posibleng programa sa pagpapalitan ng mga manlalaro ng dalawang liga.

Nakipag-ugnayan na rin si Marcial sa Board of Governors hinggil sa plano ng KBL at nakuha ang pag-apruba ni PBA Chairman Ricky Vargas na makisali sa korean league.

Agosto noong nakaraang taon nang ihayag ng KBL na palalawakin nito ang kanilang asian player quota sa 2022 Season.

Kinumpirma ni UFC Chief Business Officer Hunter Campbell, na hindi na kailangang isailalim pa sa isolation o quarantine ang mga fully vaccinated UFC fighters bago maganap ang kanilang laban ngayong linggo na gaganapin sa Anaheim, California.

Ayon kay Campbell, tanging ang mga atletang unvaccinated na lalaro o sasabak sa UFC 270 ang ilalagay sa pagsusuri ng dalawang beses sa loob ng isang linggo at kailangan ding sumailalim sa quarantine.

Samantala, kailangan ring mag-negatibo ang mga nabakunahang atleta maging ang mga nakakaranas ng sintomas ng COVID-19 sa isang pre-arrival test at susuriin din para sa COVID bago payagang umalis.

Ang nasabing mga protocol ay inilatag ng California State Athletic Commission (CSAC) na sinuportahan ng UFC. —sa panulat ni Angelica Doctolero

Nag-iisip na ng plano ang Philippine Basketball Association (PBA) upang matapos ang pagdaraos ng Governor’s Cup.

Ayon kay PBA Commissioner Willie Marcial, isa sa mga ikinokonsidera ay ang pagpapauwi ng lahat ng imports at pagkakaroon ng All-Filipino Conference.

Huling opsyon ang pagkansela sa tournament.

Sa ngayon, makikipagpulong na si Marcial sa mga koponan para sa gagawing solusyon.  —sa panulat ni Abigail Malanday