SPORTS

Walang ipatutupad na bawas-sweldo ang PBA sa mga player nito sa kabila ng indefinite suspension ng mga laro at scrimmages dulot ng COVID-19 pandemic.

Tiniyak ni PBA Commissioner Willie Marcial na magpapatuloy ang sahod ng mga manlalaro na malaking sakripisyo para sa mga team owner kaya humingi siya ng pasensya sa mga ito.

Umaasa naman si Marcial na magiging maayos na ang sitwasyon sa susunod na tatlo hanggang apat na linggo.

Sa ngayon anya ang karamihan sa mga PBA squad ay nagsasagawa ng non-scrimmage workouts para sa pitong grupo bawat session sa ilalim ng mahigpit na health at safety protocols.

Nauna nang nagpataw ang pro-league ng 20% cut sa suweldo sa mga player, coach, assistant coach, team manager at empleyado ng liga simula noong April 2021.

Gayunman, inalis ng PBA ang cut nang makuha ng mga koponan ang Go Signal na magsagawa ng full-contact na training sa iba’t ibang pasilidad sa Batangas.

Inihayag ni League Chairman Ricky Vargas na hindi maaring makalaro bilang local sa Philippine Basketball Association (PBA) ang mga naturalized Filipino players o yung mga adopted foreign players sa Pilipinas.

Kasunod ito ng pagpapahiwatig ng ilang foreign players kabilang na sina Andray Blatche at Marcus Douthit na kapwa naturalized centers at may intensiyong maglaro sa liga.

Matatandaang naging kinatawan si Blatche ng pilipinas sa dalawang  edisyon ng  Fiba Basketball World Cup habang naging import naman si Douthit ng Air21 noong 2012 at ng Blackwater noong 2015 at naglaro rin para sa gilas pilipinas sa ilang events, kabilang na ang fiba asia championship, Fiba Asia Cup, at Southeast Asian Games.

Ayon kay Vargas, nakikitaan nila ng oportunidad ang dalawang manlalaro kaya’t papayagan silang makapaglaro pero bilang imports lamang sa PBA dahil hindi pa umano bukas ang pinto ng pba para sila ay maging local players. —sa panulat ni Angelica Doctolero

Patuloy na umaasa ang mga atletang Pilipino kung kailan maipagpapatuloy ang kanilang pag-eensayo matapos ideklara ng Philippine Sports Commission (PSC) na ihinto muna ang lahat ng aktibidad matapos muling sumirit ang kaso ng COVID-19.

Ayon kay PSC Commissioner Ramon Fernandez, uunti-untiin nila ang pagpapasok at pagbabalik ng training ng mga atletang Pinoy pero hindi pa sa ngayon.

Samantala, balik pag-eensayo naman ang mga boksingero at karate sa Baguio habang pinayagan naman ang mga tri-athletes at duo-athletes para sa bubble training set-up.

Inihayag naman ng PSC na ang Philsports Complex sa Pasig, Rizal Memorial Sports Complex sa Maynila at Teachers Camp sa Baguio ang gagawing training areas para sa mga atletang naghahanda sa sea games na gaganapin may 12 hanggang 23 at Hangzhou Asia set na gaganapin naman sa Setyembre 10 hanggang 25.

Sa gitna ng COVID-19 surge sa bansa, target ng Premier Volleyball League na magsagawa ng 3 conference season na magsisimula sa Pebrero.

Determinado ang PVL na simulan ang season nito sa Open Conference sa February 16 tampok ang 10 teams sa Paco Arena Events and Sports Center sa Maynila o Royale Tagaytay sa isang bubble setup.

Magugunitang ginanap ng liga ang Bubble Open Conference noong nakaraang taon kung saan ang Chery Tiggo ang namuno sa 10-Team Field.

Ayon kay PVL President Ricky Palou, tatakbo ang Open conference ng 3 buwan na may parehong Single round Robin Preliminaries habang 2 bagong koponan ang inaasahang sasali sa Liga.

Hinahangad din ng Sports Vision na ilunsad ang PVL Asian Invitational mula July 2 hanggang August 7 sa hindi pa natukoy na venue, kung saan iniimbitahan ang pambansang koponan at dalawang foreign squad.

Umaasa ang PVL na tapusin ang taon sa pamamagitan ng pagbabalik ng reinforced conference mula October 1 hanggang November 29.

Nagwagi sa nba ang Minnesota Timberwolves kontra Houston Rockets sa iskor na 141-123.

Pinangunahan ni Center-Power Forward Karl-Anthony Towns ang koponan matapos makaambag ng 40 points, 9 rebounds at 7 assists habang nasayang naman ang 22 points, 8 rebounds at 3 assists ni Christian Wood Ng Rockets.

Pinadapa ng timberwolves ang rockets sa una hanggang ikatlong quarter dahilan ng kanilang pagkapanalo.

Abangan naman bukas ang susunod na laro ng Timberwolves kung saan, kanilang makakalaban ang New Orleans Pelicans, alas-nueve ng umaga, oras sa Pilipinas.—sa panulat ni Angelica Doctolero

Nilampaso ng Miami Heat ang Phoenix Suns sa nba matapos lumamang ng 20 puntos sa iskor na 100-123.

Lumamang sa 1st, 2^nd at 4^th quarter ang Miami kung saan, nanguna sa panalo ng koponan si Tyler Herro na nakapagtala ng 33 points, 5 rebounds at 3 assists.

Samantala, nasayang naman ang 26 points, 4 rebounds at 3 assists na pinakawalan ng Suns player na si Devin Booker.

Abangan ang susunod na laro ng miami sa Huwebes, January 13, 2022 kung saan, kanilang makakalaban ang Atlanta Hawks, alas-8:30, oras sa Pilipinas.   —sa panulat ni Angelica Doctolero

Minomonitor ngayon ng Samahang Basketball ng Pilipinas (SBP) ang sitwasyon ng COVID-19 sa bansa bilang paghahanda sa nalalapit na 2023 World Asian Qualifiers sa darating na February 24, 2022.

Kasunod ito ng patuloy na pagtaas ng kaso ng COVID-19 sa Pilipinas matapos maitala ang mahigit 26,000 mga bagong kaso ng nasabing virus.

Nabatid na ang naturang event ay lalahukan ng group a na kinabibilangan ng South Korea, New Zealand, India at Philippines sa isang bubble set-up na gaganapin sa Smart Araneta Coliseum.

Ayon kay SBP Assistan Ryan Gregorio, anuman ang maging restriksiyon o desisyon ng national government sa pagsasagawa ng international sporting events ay kanilang susundin.

Matatandaang una nang naantala ang nasabing aktibidad noong Nobyembre 2021 dahil sa patuloy na pagtaas ng kaso ng COVID-19 dahilan kaya inilipat ito sa Pebrero ngayong taon. —sa panulat ni Angelica Doctolero

Siksik ang schedule ni Pinoy Pole Vaulter EJ Obiena.

Kasunod na rin ito sa limang malalaking international tournaments na sasalihan ni Obiena sa taong ito.

Si Obiena ay inaasahang sasabak sa Asian Indoor Athletics Championships sa Nur Sultan, Kazakhstan mula February 11 hanggang 13.

Pasok din ang World Number 6 sa 2022 IAAF World Indoor Championshps sa March 18 sa Belgrade, Serbia, Vietnam Sea Games sa Mayo, World Athletics Championships mula July 15 hanggang 24 sa Oregon, USA at 2022 Asian Games sa Hangzhou, China sa Setyembre.

Gayunman, tila nakabitin pa ang partisipasyon ni Obiena sa mga nasabing events dahil hihingan ng International Olympic Committee ng endorsement ng Pinoy Vaulter ang PATAFA kung saan ito mayruong hidwaan.

Bukod sa mga naturang events, sinasabing si Obiena ay kakatawan din sa Pilipinas sa init indoor meeting sa Karlsruhe, Germany sa January 28.