SPORTS

Nakatakdang magasagawa ng National Team Try-Out ang Philippine Swimming Team para paghandaan ang 2022 Vietnam Southeast Asian Games na gaganapin sa buwan ng Mayo.

Matatandaang binuksan kamakailan ang Rizal Memorial Sports Complex Swimming Pool para sa mga pambansang atleta ng Philippine Sports Commission (PSC) kung saan, itatanghal ang 2022 Psi National Open (PNO) na magsisimula sa February 25 hanggang 27.

Ayon sa swimming body, ang naturang kompetisyon ay mahigpit na sasailalim sa isang buong bubble format upang matiyak ang kaligtasan ng lahat ng atleta.

Layunin ng philippine swimming team na sungkitin ang panalo at buuin ang kanilang momentum mula sa 2019 Sea Games, kung saan nakakuha ng kabuuang labing anim na medalya ang mga Filipino Tanker. —sa panulat ni Angelica Doctolero

Lumarga na ang dibdibang ensayo ni Olympic Gold Medalist Hidilyn Diaz bilang preparasyon sa pagsabak sa 2021 Southeast Asian Games sa Hanoi, Vietnam.

Ayon kay Diaz, ipinagpapatuloy niya ang pagsasanay sa Pilipinas at nakatutok sa sea games qualifier na inorganisa ng samahang weightlifting ng pilipinas na gaganapin sa Marso sa Bacolod City, Negros Occidental.

Ipagtatanggol ng kauna-unahang Pinay Olympic Medalist ang kanyang korona sa sea games sa Hanoi matapos siyang manalo noong 2019.

Sa ngayon ay magsasanay si Diaz sa Maynila pero nilinaw ng kanyang coach na si Julius Naranjo na mananatiling opsyon ang pagbabalik sa Malaysia upang ipagpatuloy ang build-up.

Nakasalalay anya ang desisyon sa pagsabak ni Hidilyn sa qualifying tournament.

Nasikwat ni Alex Eala ang second-round ticket sa W60 Grenoble tournament matapos ang panalo kontra sa Swiss na kalaban sa France.

Naselyuhan ng 16 anyos na atleta ang kanyang unang round nang pabagsakin si Joanna Zuger ng Switzerland sa set na 6-4, 6-1, noong Martes ng gabi sa round of 32.

Ang tagumpay ay naging marka sa pagpasok nito sa main draw matapos ang serye ng qualifiers para sa Women’s Circuit.

Ang W60 Grenoble ang pangalawang $60,000 event ni Eala pagkatapos niyang magsimulang sumali sa mga Pro noong 2020.

Go signal na lamang ang hinihintay ng Gilas Pilipinas Women para makapagsimula na ng kanilang training camp para sa Vietnam Southeast Asian Games sa May 12 hanggang 23.

Ayon kay head coach Patrick Aquino, nagpadala na sila ng sulat sa Philippine Sports Commission upang humingi ng basbas para gumulong na ang pagsasanay nito.

Target ng Gilas Filipinas na mai-depensa ang dalawang gold medals na nahablot sila sa 2019 Sea Games kung saan kapwa namayani sa 5 on 5 at 3×3 competitions.

Tiwala si Aquino na hindi na sila o-obligahing magsagawa ng bubble type camp tulad ng kanilang counterpart na nagsasagawa ng kanilang training sa Moro Lorenzo Sports Center sa Quezon City.

Bukod sa Sea Games, naghahanda rin ang Gilas Pilipinas Women sa pagsabak sa 2022 Asian Games sa Hangzhou, China sa Setyembre.

Magsisilbing coach ng team Durant ang Filipino-American coach ng Miami Heat na si Erik Spoelstra sa gaganaping NBA All-Star game sa Pebrero a–20 sa Cleveland, Ohio.

Natanggap ni Spoelstra ang posisyon matapos magtala ang Heat ng kartadang 34-20 na pinakamahusay na record sa Eastern Conference Division hanggang Pebrero a–5.

Si Chicago Bulls Coach Billy Donovan ang nagsilbing contender para sa East pero natalo ang koponan sa score na 119-108 laban sa Philadelphia 76ers noong linggo kaya’t natengga ang Bulls sa standing na 33-20.

Sa ikalawang beses na pagko-coach ni Spoelstra sa All Star, team captain si Durant na star player ng Brooklyn Nets.

Makakaharap naman nina Durant ang team Lebron ni Los Angeles Lakers Superstar at Captain Lebron James sa Western Conference Division at pinangungunahan ni Coach Monty Williams ng Phoenix Suns.

Hawak ng Suns ang kartadang NBA-Best 42-10 record sa Western conference.

Hindi ititigil ng PBA ang mga laro sa Governor’s Cup habang magaganap ang FIBA World Asian Qualifiers sa huling bahagi ng Pebrero.

Ayon kay PBA Chairman Ricky Vargas, nakipag-coordinate na sila sa mga venue upang matiyak na matutuloy ang mga laro kahit na on-going ang FIBA window.

Aniya, magaganap ang fiba window sa Pebrero 24 hanggang 28 sa Araneta Coliseum kung saan maglalaro ng apat na games ang Gilas Pilipinas National Team sa qualifying rounds.

Samantala, ayon sa League Commisisioner Willie Marcial magpapatuloy ang mga laro ng pba sa Pebrero 11 sa Ynares Center sa Antipolo. – sa panulat ni Airiam Sancho

Tinambakan ng 29 na puntos ng Milwaukee Bucks ang Portland Trail Blazers sa NBA sa iskor na 137-108.

Nilampaso ng Bucks ang Blazers sa 1^st hanggang 3^rd quarter kung saan, nanguna sa panalo ng koponan si Bobby Portis na nagpakawala ng 30 points, 4 rebounds at 5 assists.

Nakaambag din sa Bucks ng 29 points, 9 rebounds at 6 assists si Giannis Antetokounmpo habang nasayang naman ang naitalang 19 points ni Anfernee Simons ng Blazers.

Abangan naman bukas ang susunod na laro ng Bucks kung saan, kanilang makakalaban ang Los Angeles Clippers alas-10 ng umaga, oras sa Pilipinas.  —sa panulat ni Angelica Doctolero

Inilabas na ng National Basketball Association (NBA) ang iba pang manlalaro na kasama sa reserves sa nalalapit na pagdaraos ng All-Star Weekend.

Kabilang dito sina; Jimmy Butler ng Miami Heat para sa Eastern Conference na sasamahan ng first-time members na sina Darius Garland ng Cavaliers at Fred Vanvleet mula sa Raptors.

Magiging bahagi rin sina James Harden ng Brooklyn, Zach Lavine mula sa Bulls, Khris Middleton ng Bucks at si Jayson Tatum ng Celtics.

Ang NBA All-Star Draft Show ay magaganap sa Pebrero a-10 kung saan pipili ang dalawang team captains na sina James at Durant ng kanilang players.

Habang sa Pebrero a-20 magaganap ang All-Star Game sa Cleveland. —sa panulat ni Abby Malanday

Ilang araw bago ang pag-arangkada ng Philippine Basketball Association (PBA) Governor’s Cup, idinagdag ng PBA ang pagsasagawa ng antigen test bilang requirement sa mga manlalaro bago mag-ensayo.

Inihayag ni PBA Commissioner Willie Marcial na pangunahing prayoridad pa rin ang kalusugan sa pagpapatupad ng mas mahigpit na safety measures upang tuluyang malabanan ang COVID-19 sa pagpapatuloy ng huling conference ng liga.

Isinasagawa na rin ng commissioner’s office ang rescheduling ng mga laro sa pagbabalik liga simula sa Pebrero a–11 sa Smart Araneta Coliseum.

Natuldukan na ng Los Angeles Lakers ang sunod-sunod na pagkatalo matapos na mamayani sa laro laban sa Portland Trail Blazers sa iskor na 99-94.

Itoy matapos ang tatlong talo na nalasap ng Lakers.

Nagpamalas ang Lakers Big Man at All Star na si Anthony Davis ng 19 points sa fourth quarter mula sa kabuuang 30 points at 15 rebounds.

Malaking ambag din ang itinulong ni Carmelo Anthony na 24 points, habang hindi pa rin nakakabalik sa game si Lebron James sa ikaapat na sunod na laro dahil sa pamamaga ng paa.

Sa ngayon hawak na ng lakers ang 25-27 win-loss record para sa ika-siyam na puwesto sa Western Conference.