SPORTS

Aminado ang Philippine Olympic Committee (POC) na mahihirapan ang National Athletes na dipensahan ang Pilipinas para sa Southeast Asian Games.

Ayon kay POC President Abrahamtolentino, malaking hamon sa mga atletang Pinoy ang nasabing kompetisyon lalo na’t nasa gitna parin ng pandemiya ang bansa.

Sinabi ni Tolentino na bukod sa limitado ang galaw ng mga Pilipino, kulang din ang mga training facilities dahil pansamantalang ginamit ng gobyerno ang ilang mga quarantine spaces o mga gym sa bansa.

Bukod pa diyan, wala ding sapat na pondo ang gobyerno para gastusan ang pangangailangan ng mga atleta dahil nakatuon ngayon ang pamahalaan sa pagtugon sa tumataas na bilang ng mga tinatamaan ng COVID-19.

Sa kabila nito, kumpiyansa parin si Tolentino na ang pagpupursige ng mga atleta sa Biennial Meet, ay magbibigay parin sa bansa ng magandang standing. —sa panulat ni Angelica Doctolero

Tiniyak ng Philippine Olympic Committee (POC) ang paglahok ni Olympic Pole Vaulter Ernest John Obiena sa Southeast Asian Games at Asian Games ngayong taon.

Sa kabila ito ng gusot sa pagitan ni obiena at kinabibilangan niyang national sports association na Philippine Athletics Track and Field Association (PATAFA).

Ayon kay POC Chairman President Abraham “Bambol” Tolentino, kahit walang kinabibilangang National Sports Association (NSA) Ay hindi mapuputol ang suporta nila kay EJ Upang kumatawan sa Pilipinas.

Nakasaad anya sa probisyon ng international Olympic Committee Charter na tanging ang National Olympic Committee, tulad ng POC Ang may otorisasyong magsumite ng mga delegasyon.

Ipinunto ni Tolentino na ang pagpili sa isang delegado ay nakabatay din sa husay ng atleta, kakayahang magsilbi bilang ehemplo sa kabataan at hindi lamang sa kinabibilangang NSA.

Pinataob ng New Orleans Pelicans ang Indiana Pacers sa NBA sa iskor na 117-113.

Lumamang ng one point ang Pacers sa unang quarter habang naging tabla ang iskor ng dalawang koponan sa ikalawa at ika-apat na quarter pero nagawang makabawi ng Pelicans sa ikatlong quarter dahilan ng kanilang pagkapanalo.

Nanguna sa koponan si Davonte’ Graham na may 25 points, 3 rebounds, 6 assists at Josh Hart na nakapagtala naman ng 22 points, 10 rebounds at 2 assists.

Abangan naman mamaya ang susunod na laro ng Pelicans kung saan, kanilang makakalaban ang Philadelphia 76ers alas-otso ng umaga, oras sa Pilipinas. —sa panulat ni Angelica Doctolero

Aminado si NLEX coach Yeng Guiao na nanghinayang siya sa magandang nasimulan ng kaniyang mga players matapos isuspinde ang laro sa PBA Governor’s Cup.

Ayon kay Guiao, malaki ang epekto ng break sa kanilang team bunsod ng pagsipa ng COVID-19 cases matapos ang nagdaang holiday season.

Sinabi ni Guiao na matagal nang hindi nakakapagsimula ng magandang laro ang nlex team pero naiintindihan niya ang naging desisyon at prayoridad ng pba para sa mga manlalaro.

Sa ngayon, hinihintay pa ng PBA ang official go-signal mula sa IATF para sa pagpapatuloy ng conference makaraang makakuha ng formal endorsement mula sa Games and Amusement Board (GAB). — sa panulat ni Angelica Doctolero

Napanatili ni Cameroonian Fighter Francis Ngannou sa Ultimate Fighting Championship (UFC) 270 ang kaniyang heavyweight title.

Ito’y matapos na talunin si Ciryl Gane via unanimous decision sa laban na ginanap sa honda center sa Aneheim, USA.

Bagamat nahirapan si Ngannou sa first round ay nakabawi ito sa second round at tuluyang pinataob si Gane.

Samantala, inamin nito na mayroon siyang iniindang injury sa kaniyang tuhod. - sa panayam ni Airam Sancho 

Hindi makakasabak sa laro sa loob ng anim hanggang walong linggo ang guard ng Chicago Bulls na si Alex Caruso.

Ayon sa management ng Bulls, ooperahan ang si Caruso dahil sa wrist injury nang mag-foul ito ni Grayson Allen ng Milwaukee Bucks kamakailan.

Napatawan ng level two flagrant foul si Allen at na-eject matapos ang nasabing laro.

Noong una ay simpleng foul lang ang ipinataw kay Allen pero itinaas ito sa flagrant matapos ma-review ng mga opisyal ang video kung saan napatunayan na sinadya nito ang pagsagi kay Caruso.

Irerepresenta ng Bren Victress at Omega Esports Empress ang Pilipinas sa Mobile Legends Bang Bang Women’s Invitational.

Magaganap ito sa Enero a-27 hanggang a-29.

Pitong koponan ang makakalaban ng dalawang grupo sa Southeast Asia para sa grandprice na 12 thousand US dollars o katumbas ng 798, 900 pesos.

Ilan sa kanilang makakalaban ay ang kinatawan ng Singapore, Malaysia, Cambodia, Laos at Indonesia. —sa panulat ni Abby Malanday