SPORTS

Nagbigay-pugay ang ilang PBA player at coaches lalo ang mga naging bahagi ng Alaska Aces sa paglisan nito sa Philippine Basketball Association (PBA) matapos ang 35 seasons.

Kabilang sa mga nagbigay-pugay si three-time most valuable player Bogs Adornado na unang superstar ng Alaska isang taon matapos sumali ang koponan sa PBA.

Kanya-kanyang post din ng tribute sa social media ang iba pang basketbolista tulad nina Nic Belasco, Jerron Teng at Ken Bono.

Ikinalungkot din ni Barangay Ginebra Coach Tim Cone ang paglisan ng Alaska sa liga pero nagpasalamat siya sa maganda at napakahaba niyang karanasan sa Aces kung saan siya humakot ng kampyonato.

Naging bahagi rin ng Alaska sina PBA legend Johnny Abarrientos, Jojo Lastimosa,Willie Miller, Calvin Abueva at LA Tenorio. —sa panulat ni Mara Valle

Magreretiro na sa Philippine Basketball Association (PBA) ang Alaska franchise makalipas ang 35 taon.

Inanunsyo ito mismo ni Alaska Team Owner Fred Uytengsu na umaming mahigpit nilang pinag-isipan bago pinal na magpasyang kumalas na sa PBA.

Naniniwala aniya silang ang pag-alis sa PBA ay magiging daan sa pagtutok nila sa kanilang resources para maisulong ang abot kayang nutrisyon sa mga pamilyang pilipino.

Ang kasalukuyang Governor’s Cup ang magsisilbing final conference ng Alaska franchise na sumali sa PBA nuong 1986.

Sisikapin ng Magnolia Hotshots na mapanatili ang unbeaten record sa PBA Governors Cup.

Hawak ng Hotshots ang kartadang 4 – 0 at tatangkaing ipako ang ikalimang panalo sa kanilang pakikipagsagupa sa NLEX Road Warriors, mamaya.

Gayunman, hindi makapagalaro ang starplayer ng Magnolia na si Calvin Abueva matapos magtamo ng injury.

Nasa injured list din sina Rome Dela Rosa at James Laput.

Aminado naman si Magnolia Coach Chito Victolero na hindi magiging madali ang laban lalo’t gutom sa panalo ang Road Warriors matapos ang dalawang sunod na pagkatalo. —sa panulat ni Mara Valle

Tatanggap ng cash incentives ang Philippine Women’s Football Team mula sa Philippine Sports Commission matapos makwalipika sa 2023 FIFA Women’s World Cup.

Ito ay matapos aprubahan ng PSC ang aabot sa P1.25M kung saan, ang bawat manlalaro ay makakakuha ng P50,000 bilang pagkilala sa kanilang galing makaraang umabot sa Semifinals ng 2022 AFC Women’s Asian Cup.

Ipinagmalaki at ikinatuwa naman ni PSC Chair Butch Ramirez ang naging panalo ng bansa sa tulong ng mga atletang dumalo sa unang Physical flag-raising ceremony ng ahensiya na isinagawa sa Rizal Memorial Sports Complex.

Matatandaang tinalo ng Pilipinas ang pambato ng Chinese Taipei sa quarterfinals ng AFC Women’s Asian Cup dahilan para umabante ang bansa sa 2023 FIFA Women’s World Cup. —sa panulat ni Angelica Doctolero

Magbabalik na sa Gilas Pilipinas ang dating National Team Player na si Marc Pingris pero hindi para maglaro kundi magsilbing Assistant Coach.

Ito ang kinumpirma ni samahang Basketbol ng Pilipinas Deputy Executive Director Butch Antonio bilang preparasyon sa FIBA World Cup Asian Qualifiers sa katapusan ng Pebrero.

Kamakailan ay itinalaga rin si Pingris bilang Commissioner ng bagong tatag na Pilipinas Super League.

Naging bahagi ng gilas ang tinaguriang ‘Pinoy Sakuragi’ at malaki ang naging papel upang masungkit ng Philippine National Team ang 2013 fiba asia championships at 2014 Fiba World Cup Ticket. – sa panulat ni Mara Valle

Hindi muna makakalaro sa PBA Governors’ Cup ang bagong player ng Barangay Ginebra na si Sidney Onwubere matapos magka-injury sa kanilang naging laban kontra Magnolia Hotshots.

Ayon kay Coach Tim Cone, nagkaroon ng major ankle sprain si Onwubere kung saan, posibleng hindi muna ito makalaro sa natitirang bahagi ng torneo dahil sa insidente.

Sinabi ni Cone na kailangan munang ipahinga ni Owunbere ang kaniyang iniidang injury ng buong season dahil kailangan nitong magpahinga ng hanggang anim na linggo o higit pa.

Bukod kay Owunbere, kasama sa injury list ay sina Stanley Pringle, Aljon Mariano, Joe Devance, Jared Dillinger, at Mark Caguioa.  —sa panulat ni Angelica Doctolero

Pasok na sa listahan ng Gilas Pilipinas National Team si Robert Bolick para sa 2023 FIBA World Cup Asian qualifiers sa Pebrero a – 20.

Kinumpirma ni Samahang Basketbol ng Pilipinas President Al Panlilio ang balita matapos mag-post sa Instagram si Gilas Head Coach Chot Reyes.

Sa naturang post, inihayag ni Reyes na nag te-training si Bolick kasama ng National Team Members sa Moro Lorenzo Gym sa Quezon City.

Kasalukuyang nasa Free Agency si Bolick sa PBA at hindi pa muling lumalagda sa Northport batang pier kahit nagsimula nang muli ang Governors’ Cup.  —sa panulat ni Mara Valle

Tinambakan ng Phoenix Suns ang Orlando Magic sa NBA makaraang lumamang ng 27 points sa iskor na 132-105.

Hindi nakabawi ang magic matapos lampasuhin ng Suns sa una hanggang ika-4 na quarter.

Nanguna sa panalo ng koponan si small-forward-shooting guard Devin Booker na nakapagtala ng 26 points, 5 rebounds at 5 assists habang nasayang naman ang naitalang 20 points, 6 rebounds at 10 assists ni Jalen Suggs ng Magic.

Abangan naman sa Miyerkules, February 16, ang susunod na laro ng suns kung saan, kanilang makakalaban ang Los Angeles Clippers, alas-11 ng umaga, oras sa Pilipinas.  —sa panulat ni Angelica Doctolero

Bubuksan na ng Philippine Basketball Association (PBA) ang kanilang pintuan para sa mga live audience na magsisimula sa Martes, February 16.

Ito ay matapos umabot sa 100% ang bilang ng mga manlalaro na nabakunahan na kontra Covid-19, habang 95% ang nakatanggap ng booster shot.

Ayon kay League Commissioner Willie Marcial, maaaring mag-book ng ticket reservations ang mga nais manood simula ngayong araw.

Welcome naman para sa mga organizers at sa big dome ang desisyon.

Maglalaban sa Miyerkules ang NLEX at Magnolia dakong alas-3 na hapon na susundan ng san miguel at talk n text pagsapit ng alas-sais ng gabi.  —sa panulat ni Abby Malanday

Pumanaw na ang miyembro ng Philippine National Underwater Hockey Team na si Johanna Lim Uy.

Pagkumpirma ng Philippine Sports Commission (PSC), namatay ang 41-anyos na sea games silver medalist dahil sa sunog kasama ang kaniyang 67-anyos na ina.

Hindi nakalabas ang dalawa sa ikalawang palapag ng kanilang bahay na natupok at umabot sa unang alarma.

Ilang atleta naman ang nagpaabot ng pakikiramay sa nasawing mga biktima.

Si Uy ay nagwagi ng dalawang silver medal sa women’s 4 by 3 at women’s 6 by 6 events sa underwater hockey competition noong 2019. —sa panulat ni Abigail Malanday