SPORTS

Inaasahang muling maghahakot ng tagumpay sa Thailand si Pinay teen tennis sensation Alex Eala na papalo sa second leg ng W25 Chiang Rai simula ngayong araw sa Chiang Rai sports center, Thailand.

Noong linggo, nasungkit ng 16-anyos na atleta ang kampeonato ng W25 Chiang Rai first leg tournament matapos patalsikin si Luksika Kumkhum ng host Thailand, sa score na 6-4, 6-2 sa Women’s singles finals.

Ito ang ikalawang international tennis federation professional title ni Eala at kanyang unang championship ngayong taon.

Papasok sa ikalawang sigwada ng torneyo, makakasagupa ng Rafa Nadal academy scholar sa opening round ng women’s singles event si top seed Indy De Vroome ng Netherlands.

Matatandaan na nakatambal ni Eala si De Vroome sa women’s doubles event noong first leg ng patimpalak.

Rumesbak ang Meralco Bolts sa Barangay Ginebra Gin Kings sa kanilang muling paghaharap sa PBA Governor’s Cup finals.

Liyamado na ang Bolts sa serye sa kartadang 2-1 makaraang patumbahin ang Gin Kings sa score na  83-74 sa game 3 ng best of 7 series ng finals sa moa Arena, Pasay, kagabi.

Kapwa nag-ambag ng double-doubles sina Tony Bishop ng 30 points, 16 rebounds at Chris Newsome ng 20 points, 11 rebounds upang umalagwa ang Bolts sa second half.

Bagaman sa first half ay hawak ng Barangay Ginebra ang momentum, nakahabol ang Meralco sa pagpasok ng third quarter.

Muling maghaharap ang dalawang koponan sa game 4 sa Smart Araneta Coliseum sa Miyerkules, April 13.

Pinadapa ng Memphis Grizzlies ang New Orleans Pelicans sa NBA sa iskor na 141-114.

Natambakan ang Pelicans sa una hanggang 3^rd quarter dahilan para maitala ang 56 wins ng Grizzlies.

Nanguna sa panalo ng koponan si Dillon Brooks na nakapagtala ng 23 points, 3 rebounds at 5 assists habang nakaambag din sina Ja Morant na may 21 points at Brandon Clarke na may 20 points.

Abangan naman mamaya ang susunod na laro ng Grizzlies kung saan, kanilang makakalaban ang Boston Celtics, alas-7 ng umaga, oras sa Pilipinas. —sa panulat ni Angelica Doctolero

Nanatiling walang talo si Tokyo olympics bronze medalist Eumir Marcial matapos magapi ang American opponent nito na si Isiah Hart sa ika-4 na round middleweight match sa Virgin Hotels Las Vegas.

Ito’y matapos tatlong beses na mapatumba ng kalaban si Marcial sa loob ng 1^st at 2^nd round ng laban habang bumawi naman ang Pinoy olympian sa ika-4 na round nang pahintuin ng referee ang laban.

Matatandaang ito na ang ikalawang panalo sa pro boxing ni Marcial.

Muling nasungkit ng Filipina tennis ace player na si Alex Eala ang pangalawang panalo matapos talunin si Luksika Kumkhum ng Thailand sa finals ng W25 Chiang Rai Tournament.

Ito ang second pro title ni Eala nang makuha ang kampeon sa W15 manacor tournament noong 2021.

Dahil sa pagkapanalo sa W25, makakatanggap ng 25,000 dollars bilang premyo ang tennis player.–-sa panulat Airiam Sancho

Nasungkit ng University of the Philippines Baskteball team ang ika-6 nilang sunod na panalo sa nagpapatuloy na University Athletic Association of the Philippines (UAAP) Season 84.

Ito ay matapos mapataob ang kalabang koponan na Far Eastern University sa iskor na 83-79.

Pinangunahan ito ni Zavier Lucero ng dalawampu’t pitong puntos; Carl Tamayo na may labingdalawang puntos at ang trending player  ngayon na si Ricci Rivero na kumamada ng sampung puntos.

Sa ngayon, nasa ikalawang pwesto na ang UP na may 6 na panalo at 1 talo.— Sa panulat ni Abie Aliño

TINAMBAKAN ng Milwaukee Bucks ang Detroit Pistons sa score na 131-101 sa kanilang laro sa NBA o National Basketball Association.

Si Giannis Antetokounmpo ang nanguna sa Bucks sa pamamagitan ng kanyang 30 points at 13 rebounds.

Dahil dito, umakyat na ang kartada ng Milwaukee sa 51 wins at 30 losses.

Sasagupain naman ng Bucks ang Cleveland Cavaliers sa Lunes para sa ikalawang puwesto sa Eastern Conference.

Nakabawi si Alex Eala matapos mapataob ang haponesang si Momoko Kobori sa W25 Chiang Rai tournament sa Thailand.

Dahil dito, umusad na si Eala sa semifinal stage kung saan makakaharap naman nito si Yexin Ma ng China na una nang nakatalo kay Ho Ching Wu ng Hong Kong.

Una nang nakatakas si Eala sa kamay nang nakasagupang Serbian sa round of 32 bago tuluyang mamayani sa hometown bet ng Thailand sa round of 16.

Ito na ang ika-pitong tournament ng Pinay teen tennis sensation kung saan target nitong makuha ang ikalawang professional title matapos mamayani sa W15 Manacor nuong 2021.

Nakatakdang magkaroon ng comeback si Former Five-Division World Champion Floyd Mayweather Jr. para sa isang Exhibition Fight laban kay Don Moore sa May 14.

Ayon sa boksingero, ang eight-round exhibition na gaganapin sa Burj Al Arab Hotel sa dubai ay maituturing na oportunidad para maging sentro ng laro na kaniyang maaalala.

Si Mayweather ay dating boksingero at nakapagtala ng rekord na 50-0 at 27 knockouts.

Tatangkain ng defending champion Barangay Ginebra Gin Kings na sumikwat ng panalo sa game ng PBA Governors Cup finals kontra Meralco Bolts.

Aminado si Meralco Coach Norman Black na inaasahan na nilang magiging dikdikan ang ikalawang round sa MOA Arena, Pasay, mamayang ala-6 ng gabi.

Gayunman, nakahanda anya sila sa mga taktika ni Ginebra Coach Tim Cone na tiyak na mas magiging agresibo sa game 2.

Posible pa ring ipahinga ni Coach Tim si Forward Japeth Aguilar na nagkaroong ng injury sa game one ng kanilang semifinals series kontra NLEX Road Warriors.

Samantala, handa pa rin si Fiipino-Italian Guard Chris Banchero na maglaro para makatulong sa Bolts bagama’t may iniindang back spasm.